ഷാന്‍ വധക്കേസ്: കുറ്റപത്രം സ്വീകരിക്കരുതെന്ന പ്രതിഭാഗത്തിന്റെ ഹരജി തള്ളി

ആലപ്പുഴ: എസ്.ഡി.പി.ഐ നേതാവ് കെ.എസ് ഷാന്‍ കൊല്ലപ്പെട്ട കേസില്‍ കുറ്റപത്രം മടക്കണമെന്ന പ്രതിഭാഗം ഹരജി ആലപ്പുഴ ജില്ലാ സെഷന്‍സ് കോടതി തള്ളി. സ്ഥലം എസ്.എച്ച്.ഒ അല്ല കുറ്റപത്രം നല്‍കിയതെന്ന് കാണിച്ചായിരുന്നു ഹരജി. എന്നാല്‍ ക്രിമിനല്‍ നടപടി ചട്ട പ്രകാരം ജില്ലാ പൊലീസ് മേധാവി ചുമതലപ്പെടുത്തുന്ന ഉദ്യോഗസ്ഥന് കുറ്റപത്രം സമര്‍പ്പിക്കാം എന്നതായിരുന്നു പ്രോസിക്യൂഷന്‍ മറുപടി. വിവിധ കേസുകളും ഉദാഹരണമായി പ്രോസിക്യൂഷന്‍ ചൂണ്ടിക്കാട്ടി.

അതേസമയം, ഷാന്‍ കേസ് പ്രതികളുടെ ജാമ്യം റദ്ദാക്കണമെന്ന പ്രോസിക്യൂഷന്‍ ഹരജിയില്‍ മാര്‍ച്ച് 23 ന് വീണ്ടും വാദം കേള്‍ക്കും. കേസിലെ ആര്‍.എസ്.എസ്ബി.ജെ.പി പ്രവര്‍ത്തകരായ 11 പ്രതികളും ഇപ്പോള്‍ ജാമ്യത്തിലാണ്.

2021 ഡിസംബര്‍ 18 ന് രാത്രിയാണ് മണ്ണഞ്ചേരിക്ക് സമീപം വച്ച് എസ്.ഡി.പി.ഐ സംസ്ഥാന സെക്രട്ടറി അഡ്വ. കെ.എസ്. ഷാന്‍ കൊല്ലപ്പെട്ടത്.

ബി.ജെ.പി-ആര്‍.എസ്.എസ് പ്രവര്‍ത്തകരാണ് പ്രതികള്‍. മണ്ണഞ്ചേരി സ്വദേശി രാജേന്ദ്രപ്രസാദ്,അവലൂക്കുന്ന് സ്വദേശി വിഷ്ണു, കാട്ടൂര്‍ സ്വദേശി അഭിമന്യു, പൊന്നാട് സ്വദേശി സനന്ദ്, ആര്യാട് വടക്ക് സ്വദേശി അതുല്‍, കോമളപുരം സ്വദേശി ധനീഷ്, മണ്ണഞ്ചേരി സ്വദേശി ശ്രീരാജ്, പൊന്നാട് സ്വദേശി പ്രണവ്, കൊല്ലം ക്ലാപ്പന സ്വദേശി ശ്രീനാഥ്, കൊക്കോതമംഗലം സ്വദേശി മുരുകേശന്‍, കാട്ടൂര്‍ സ്വദേശി രതീഷ് എന്നിവരാണ് പ്രതികള്‍.