യു.ഡി.എഫ് സീറ്റ് വിഭജനം പൂര്‍ത്തിയായി; ലീഗിന് മൂന്നാം സീറ്റിന് പകരം രാജ്യസഭ, കോണ്‍ഗ്രസ് 16 സീറ്റില്‍ മത്സരിക്കും

കോഴിക്കോട്: യു.ഡി.എഫില്‍ സീറ്റ് വിഭജനം പൂര്‍ത്തിയായതായി പ്രതിപക്ഷ നേതാവ് വി.ഡി സതീശന്‍. ലീഗിന് മൂന്നാം സീറ്റില്ല, പകരം രാജ്യസഭയിലേക്ക് ഒഴിവുവരുന്ന അടുത്ത സീറ്റ് ലീഗിന് നല്‍കാന്‍ ധാരണയായെന്നും പ്രതിപക്ഷ നേതാവ് പറഞ്ഞു.

കോണ്‍ഗ്രസ് കഴിഞ്ഞ തവണത്തെ പോലെ 16 സീറ്റുകളില്‍ മത്സരിക്കും. ഒരോ സീറ്റില്‍ വീതം കേരള കോണ്‍ഗ്രസും(കോട്ടയം) ആര്‍.എസ്.പിയും(കൊല്ലം) മത്സരിക്കും. കോട്ടയത്ത് ഫ്രാന്‍സിസ് ജോര്‍ജിനെയും കൊല്ലത്ത് എന്‍.കെ പ്രേമചന്ദ്രനേയും സ്ഥാനാര്‍ഥികളായി അതാത് പാര്‍ട്ടികള്‍ പ്രഖ്യാപിച്ചിരുന്നു.

ഒഴിവ് വരുന്ന അടുത്ത രാജ്യസഭാ സീറ്റ് കോണ്‍ഗ്രസിന് ലഭിക്കേണ്ടതാണ്. അത് മുസ് ലിം ലീഗിന് കൊടുക്കും. അത് കഴിഞ്ഞ് ഒഴിവ് വരുന്ന സീറ്റ് കോണ്‍ഗ്രസ് എടുക്കുമെന്നും സതീശന്‍ പറഞ്ഞു.