സമരം ശക്തമാക്കാന്‍ കര്‍ഷകര്‍, കൂടുതല്‍ കര്‍ഷക സംഘടനകള്‍ ഭാഗമാകും; മാര്‍ച്ച് 10ന് രാജ്യവ്യാപക റെയില്‍ തടയല്‍

ന്യൂഡല്‍ഹി: ചെറിയ ഇടവേളയ്ക്ക് ശേഷം സമരം ശക്തമാക്കാന്‍ തീരുമാനിച്ച് കര്‍ഷകര്‍. രാജ്യത്തിന്റെ എല്ലാ ഭാഗത്തുനിന്നുമുള്ള കര്‍ഷകര്‍ മറ്റന്നാള്‍ ഡല്‍ഹിയിലെത്തണമെന്ന് ഡല്‍ഹി ചലോ സമരസമിതി നേതാവ് സര്‍വാണ്‍ സിങ് പാന്ഥറും ജഗ്ജിത് സിങ് ദല്ലെവലും ആഹ്വാനം ചെയ്തു. ഈ മാസം പത്തിന് രാജ്യവ്യാപകമായി ട്രെയിന്‍ തടയുമെന്നും ഡല്‍ഹി ചലോ സമരത്തിന്റെ ആവശ്യങ്ങള്‍ അംഗീകരിക്കും വരെ പ്രക്ഷോഭം തുടരുമെന്നും ഇരുവരും അറിയിച്ചു.

കര്‍ഷക സമരത്തിനിടെ കണ്ണീര്‍വാതക ഷെല്‍ തലയില്‍ പതിച്ച് കൊല്ലപ്പെട്ട യുവകര്‍ഷകന്‍ ശുഭ്കരണ്‍ സിങ്ങിനായുള്ള പ്രാര്‍ഥനാ യോഗത്തിന് ശേഷം കിസാന്‍ മസ്ദൂര്‍ മോര്‍ച്ച നേതാവ് സര്‍വാന്‍ സിങ് പാന്ഥറാണ് സമരത്തിന് ആഹ്വാനം ചെയ്തത്.

ശംഭു, ഖനൗരി അതിര്‍ത്തികള്‍ കൂടാതെ, ബട്ടിന്‍ഡ, ദബ്വാലി അതിര്‍ത്തിയിലും സമരം ശക്തമാക്കും. ഇവിടേക്ക് കൂടുതല്‍ കര്‍ഷകര്‍ എത്തും. ഹരിയാന പൊലിസിന്റെ ഭാഗത്തുനിന്നും അടിച്ചമര്‍ത്തല്‍ ഉണ്ടായില്ലെങ്കില്‍ സമാധാനപരമായ രീതിയില്‍ ഡല്‍ഹിയിലേക്ക് മാര്‍ച്ച് നടത്തും.

വിളകള്‍ക്ക് മിനിമം താങ്ങുവില പ്രഖ്യാപിക്കുക ഉള്‍പ്പെടെ വിവിധ ആവശ്യങ്ങളുന്നയിച്ചാണ് കര്‍ഷക സംഘടനകളുടെ നേതൃത്വത്തില്‍ ഫെബ്രുവരി 13ന് പഞ്ചാബില്‍നിന്നും ഡല്‍ഹി ചലോ മാര്‍ച്ച് ആരംഭിച്ചത്. സമരക്കാരെ ഹരിയാന പൊലീസ് ക്രൂരമായി നേരിട്ടിരുന്നു. കേന്ദ്ര സര്‍ക്കാറുമായി നിരവധി ചര്‍ച്ചകള്‍ നടന്നെങ്കിലും ധാരണയിലെത്താനായിട്ടില്ല. കര്‍ഷകരെ ഡല്‍ഹിയിലേക്ക് മാര്‍ച്ച് ചെയ്യാന്‍ അനുവദിക്കാതെ ഹരിയാന പൊലീസ് അതിര്‍ത്തിയില്‍ തടഞ്ഞിരിക്കുകയാണ്.

സമരം ചെയ്യുന്ന കര്‍ഷകരുടെ 10 ആവശ്യങ്ങള്‍
ഡോ. സ്വാമിനാഥന്‍ റിപ്പോര്‍ട്ട് നിര്‍ദേശിക്കുംവിധം, എല്ലാ ഉല്‍പന്നങ്ങള്‍ക്കും താങ്ങുവില നിശ്ചയിക്കുന്ന നിയമം നടപ്പിലാക്കുക.കര്‍ഷകരുടെയും കര്‍ഷകത്തൊഴിലാളികളുടെയും മുഴുവന്‍ കടങ്ങളും എഴുതിത്തള്ളുക.
2013ലെ ഭൂമി ഏറ്റെടുക്കല്‍ നിയമം പുനരാവിഷ്‌കരിക്കുക; നഷ്ടപ്പെട്ട ഭൂമിക്ക് നിലവിലുള്ളതിന്റെ നാലിരട്ടി നഷ്ടപരിഹാരം ഉറപ്പാക്കുക. ലഖിംപൂര്‍ഖേരിയിലെ കര്‍ഷകര്‍ക്ക് നീതി ഉറപ്പാക്കുക; പ്രതികളെ നിയമത്തിന് മുന്നില്‍ കൊണ്ടുവരിക.സ്വതന്ത്ര വ്യാപാര കരാര്‍ റദ്ദാക്കുക; ലോകാരോഗ്യ സംഘടനയില്‍നിന്ന് പിന്‍വാങ്ങുക.
കര്‍ഷകര്‍ക്കും കര്‍ഷകത്തൊഴിലാളികള്‍ക്കും പെന്‍ഷന്‍ ഉറപ്പാക്കുക.മുന്‍വര്‍ഷങ്ങളിലുണ്ടായ ഡല്‍ഹി കര്‍ഷക സമരത്തില്‍ ജീവന്‍ പൊലിഞ്ഞ കര്‍ഷകരുടെ കുടുംബത്തിന് നഷ്ടപരിഹാരം നല്‍കുക; കുടുംബത്തിലൊരാള്‍ക്ക് ജോലി കൊടുക്കുക.2020ലെ വൈദ്യുതി ഭേദഗതി ബില്‍ റദ്ദാക്കുകതൊഴിലുറപ്പ് ദിനങ്ങള്‍ 200 ആക്കുക; മിനിമം കൂലി 700 ആക്കി ഉയര്‍ത്തുക.വിത്തുകളുടെയും കീടനാശിനികളുടെയും വളങ്ങളുടെയും ഗുണനിലവാരം ഉറപ്പുവരുത്താന്‍ പ്രത്യേക സംവിധാനം ആവിഷ്‌കരിക്കുക.