തൊടുപുഴ: രണ്ടു മാസത്തിനിടെ കാട്ടാനയാക്രമണത്തില്‍ ഇടുക്കി ജില്ലയില്‍ പൊലിഞ്ഞത് രണ്ടു സ്ത്രീകളടക്കം അഞ്ചുപേരുടെ ജീവന്‍. ജനുവരി എട്ടിന് തോണ്ടിമല പന്നിയാര്‍ എസ്്‌റ്റേറ്റിലെ തോട്ടം തൊഴിലാളിയായ പരിമളമാണ് (44) കാട്ടാനയുടെ അടിയേറ്റ് ആദ്യം കൊല്ലപ്പെട്ടത്. തേയിലത്തോട്ടത്തില്‍ കാട്ടാനക്കൂട്ടത്തിന്റെ മുന്നില്‍ പെടുകയായിരുന്നു.

ജനുവരി 23നു കോയമ്പത്തൂര്‍ സ്വദേശി കെ. പോള്‍ രാജ് (79) മൂന്നാറില്‍ കാട്ടാനയുടെ ചവിട്ടേറ്റു കൊല്ലപ്പെട്ടു.ബന്ധുവിന്റെ മകളുടെ വിവാഹത്തില്‍ പങ്കെടുത്ത് തെന്‍മല ലോവര്‍ ഡിവിഷനിലെ കന്റീനില്‍ നിന്നു ഭക്ഷണം കഴിച്ച ശേഷം വീട്ടിലേക്കു പോകുന്നതിനിടെയിലാണ് കാട്ടാനായുടെ മുന്നില്‍പെട്ടത്. ഓടുന്നതിനിടയില്‍ വീണ പോള്‍രാജിനെ കാട്ടാന ചവിട്ടുകയായിരുന്നു.

ജനുവരി 22ന് ചിന്നക്കനാല്‍ ബിഎല്‍ റാം സ്വദേശിയായ വെള്ളക്കല്ലില്‍ സുന്ദര്‍രാജനാണ്(68) കൃഷിയിടത്തില്‍ ജോലി ചെയ്യുന്നതിനിടെ ചക്കക്കൊമ്പന്‍ എന്ന ഒറ്റയാന്റ ആക്രമണത്തില്‍ മരിച്ചത്. ഫെബ്രുവരി 26നു മൂന്നാര്‍ കന്നിമല എസ്റ്റേറ്റില്‍ ടോപ്പ് ഡിവിഷനില്‍ സുരേഷ് കുമാര്‍ (മണി -46)ആണ് മരിച്ചത്. യാത്രക്കാരുമായി പോയ ഓട്ടോറിക്ഷ അടിച്ചുകര്‍ത്ത ഒറ്റയാന്‍ ഓട്ടോ ഡ്രൈവറെ തുമ്പികൈയിലെടുത്ത് എറിഞ്ഞു കൊല്ലുകയായിരുന്നു. മൂന്നാര്‍ പെരിയവര സ്റ്റാന്‍ഡിലെ ഓട്ടോ ഡ്രൈവറാണ് മണി.