റേഷന്‍ മസ്റ്ററിങ് നിര്‍ത്തിവച്ചു

തിരുവനന്തപുരം: റേഷന്‍ വിതരണം തുടര്‍ച്ചയായി തടസ്സപ്പെട്ട സാഹചര്യത്തില്‍ മുന്‍ഗണന കാര്‍ഡുടമകളുടെ ആധാര്‍ മസ്റ്ററിങ് (ഇകെ.വൈ.സി അപ്‌ഡേഷന്‍) മാര്‍ച്ച് 10 വരെ നിര്‍ത്തിവച്ചു. ഇതിന് മുമ്പ് സാങ്കേതിക തടസ്സങ്ങള്‍ പരിഹരിച്ച് മസ്റ്ററിങ് സുഗമമാക്കുകയാണ് ലക്ഷ്യം.

മസ്റ്ററിങ്ങിനായി മാര്‍ച്ച് 15, 16, 17 തീയതികളില്‍ റേഷന്‍ കടകള്‍ക്ക് സമീപം പൊതുയിടങ്ങളില്‍ സൗകര്യമൊരുക്കും. സ്‌കൂളുകള്‍, അംഗന്‍വാടികള്‍, സാംസ്‌കാരിക കേന്ദ്രങ്ങള്‍ തുടങ്ങിയവയെയാണ് പരിഗണിക്കുന്നതെന്ന് മന്ത്രി ജി.ആര്‍. അനില്‍ വാര്‍ത്തസമ്മേളനത്തില്‍ അറിയിച്ചു. ഈ ദിവസങ്ങളില്‍ റേഷന്‍ വിതരണം ഉണ്ടായിരിക്കില്ല.

ഭക്ഷ്യധാന്യ വിതരണത്തിനൊപ്പം മസ്റ്ററിങ് കൂടി റേഷന്‍ കടകളില്‍ നടന്നതോടെ ഇപോസ് മെഷീന്‍ പ്രവര്‍ത്തിക്കാത്ത സാഹചര്യമുണ്ടായി. തുടര്‍ന്ന് എന്‍.ഐ.സി, ഐ.ടി മിഷന്‍, ബി.എസ്.എന്‍.എല്‍ മറ്റ് ഉന്നത ഉദ്യോഗസ്ഥര്‍ എന്നിവരുടെ ഓണ്‍ലൈന്‍ യോഗം ചേര്‍ന്നു. ഈ യോഗത്തിന്റെ അടിസ്ഥാനത്തിലാണ് മസ്റ്ററിങ് പത്തുവരെ നിര്‍ത്തിയത്.

കേന്ദ്ര ഭക്ഷ്യ മന്ത്രാലയത്തിന്റെ തുടര്‍ച്ചയായ ആവശ്യത്തെതുടര്‍ന്നാണ് മുന്‍ഗണന കാര്‍ഡുകളുടെ മസ്റ്ററിങ് ആരംഭിച്ചത്. ചൊവ്വാഴ്ച വൈകീട്ട് ഏഴുവരെ 13,92,423 പേരുടെ മസ്റ്ററിങ് പൂര്‍ത്തീകരിച്ചതായി മന്ത്രി പറഞ്ഞു. ഒരേസമയം മസ്റ്ററിങ്ങും റേഷന്‍ വിതരണവും നടത്തേണ്ടിവന്നത് രണ്ട് ജോലിയും ഭാഗികമായി തടസ്സപ്പെടാന്‍ ഇടയാക്കി. ഈ സാഹചര്യത്തിലാണ് ഫെബ്രുവരിയിലെ റേഷന്‍ വിതരണം ഒരു ദിവസം നീട്ടി നല്‍കേണ്ടി വന്നത്.