മഞ്ചേരി: മഞ്ചേരി ഗവ: ബോയ്‌സ് ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികള്‍  മലയാള പുതുവര്‍ഷ ദിനമായ ഇന്നലെ പുറത്തിറക്കിയ  മലയാള കലണ്ടര്‍ കൗതുകമായി. കൊല്ലവര്‍ഷം 1192ലെ 150 മലയാള കലണ്ടറുകളാണു  വിദ്യാര്‍ഥികള്‍  അധ്യാപകരുടെ സഹായത്തോടെ പുറത്തിറക്കിയത്. പുതിയ തലമുറക്കു പരിചയമില്ലാത്ത മലയാള  അക്കങ്ങളെ പരിചയപ്പെടുത്തുക, മലയാളത്തിന്റെ തനിമ വീണ്ടെടുക്കുക എന്ന ലക്ഷ്യങ്ങളോടെയായിരുന്നു വിദ്യാര്‍ഥികളുടെ പ്രവര്‍ത്തനം . മലയാളം അധ്യാപകരായ ഡോ: പ്രമോദ് ഇരുമ്പുഴി, സലീന ടീച്ചര്‍ എന്നിവരുടെ നേതൃത്വത്തിലായിരുന്നു കലണ്ടര്‍ നിര്‍മാണം.
   മലയാളി മറന്നുപോയ മലയാള അക്കങ്ങളെ മനസിലാക്കാന്‍ വിദ്യാര്‍ഥികളുടെ ഈ ശ്രമം  സഹായകരമാവും. ഇത്തരം മലയാള അക്കങ്ങള്‍ പഴയ ആധാരങ്ങളിലും ജാതകങ്ങളിലും താളിയോലകളിലും മാത്രമെ ഇന്നു കാണാന്‍ സാധിക്കുകയുള്ളു. ഇന്നു പ്രചാരത്തിലുള്ള ഇന്‍ഡോ-അറബ് ന്യൂമെറിക്ക് അക്കങ്ങള്‍  വ്യാപകമായതോടെയാണു മലയാള അക്കങ്ങള്‍ നാടുനീങ്ങിയത്. എഡി 852ലാണു കൊല്ലവര്‍ഷം ആരംഭിച്ചത്. ക്രിസ്താബ്ദത്തില്‍ നിന്നും 825കുറച്ചാല്‍ കൊല്ലവര്‍ഷം കണ്ടെത്താന്‍ സാധിക്കും. കലണ്ടറിന്റെ പ്രകാശനം  പ്രിന്‍സിപ്പല്‍ വി.സി ഗീതാമണി നിര്‍വ്വഹിച്ചു. അസീസ്മാസ്റ്റര്‍, ഉണ്ണിമാസ്റ്റര്‍, ഉഷടീച്ചര്‍ തുടങ്ങിയവര്‍ പ്രസംഗിച്ചു.