കേന്ദ്ര സര്‍ക്കാര്‍ സ്ഥാപനത്തില്‍ അസിസ്റ്റന്റാവാം; ഡിഗ്രിക്കാര്‍ക്ക് അവസരം; മാര്‍ച്ച് 27നുള്ളില്‍ അപേക്ഷിക്കണം

കേന്ദ്ര സര്‍ക്കാരിന് കീഴിലുള്ള എംപ്ലോയീസ് പ്രോവിഡന്റ് ഫണ്ട് ഓര്‍ഗനൈസേഷനില്‍ (ഇപിഎഫ്ഒ) പേഴ്‌സനല്‍ അസിസ്റ്റന്റാകാം. ആകെ 323 ഒഴിവുകള്‍. (ജനറല്‍ 132, ഒബിസി- എന്‍.സി.എല്‍ 8, എസ്.സി 48, എസ്.ടി 24, ഇഡബ്ല്യൂഎസ് 32). ഭിന്നശേഷിക്കാര്‍ക്ക് (പിഡബ്ല്യൂബിഡി) 12 ഒഴിവുകളില്‍ നിയമനം ലഭിക്കും. സ്ഥിരം നിയമനമാണ്. പ്രത്യേക പരസ്യനമ്പര്‍ 51/2024 പ്രകാരം യു.പി.എസ്.സിയാണ് അപേക്ഷ ക്ഷണിച്ചത്. വിജ്ഞാപനം: www.upsc.gov.in ല്‍.

യോഗ്യത
ബിരുദധാരികള്‍ക്കാണ് അവസരം. ഇംഗ്ലീഷ്/ ഹിന്ദി സ്റ്റെനോഗ്രഫിയില്‍ മിനിറ്റില്‍ 120 വാക്ക് വേഗമുണ്ടാകണം.

പ്രായപരിധി: 30 വയസ്. സംവരണ വിഭാഗക്കാര്‍ക്ക് നിയമാനുസൃത വയസിളവുണ്ട്.

അപേക്ഷ ഫീസ്: 25 രൂപ. വനിതകള്‍/ എസ്.സി/ എസ്.ടി/ പിഡബ്ല്യൂബിഡി വിഭാഗങ്ങളില്‍പ്പെട്ടവര്‍ക്ക് അപേക്ഷ ഫീസില്ല.

മാര്‍ച്ച് 27ന് വൈകീട്ട് ആറുമണി വരെ ഓണ്‍ലൈനായി www.upsconline.nic.in ല്‍ അപേക്ഷ സമര്‍പ്പിക്കാം. ഷോര്‍ട്ട് ലിസ്റ്റ് ചെയ്യപ്പെടുന്നവരെ ജൂലൈ ഏഴിന് ദേശീയ തലത്തില്‍ നടത്തുന്ന റിക്രൂട്ട്‌മെന്റ് ടെസ്റ്റിന് ക്ഷണിക്കും.

കോഴിക്കോട്, കൊച്ചി, തിരുവനന്തപുരം നഗരങ്ങളില്‍ പരീക്ഷ കേന്ദ്രങ്ങളുണ്ടാവും. ഇതില്‍ യോഗ്യത നേടുന്നവരെ സ്‌റ്റെനോഗ്രാഫിക് സ്‌കില്‍ ടെസ്റ്റിന് വിധേയമാക്കും. ടെസ്റ്റിന്റെ വിശദാംശങ്ങളും തെരഞ്ഞെടുപ്പ് നടപടിക്രമങ്ങളും ശമ്പളവും വിജ്ഞാപനത്തിലുണ്ട്.

ഇപിഎഫ്ഒ ഹെഡ് ക്വാര്‍ട്ടേഴ്‌സ് ന്യൂഡല്‍ഹിയിലാണ് നിയമനം നടക്കുക. ആദ്യ രണ്ടുവര്‍ഷം പ്രൊബേഷനിലായിരിക്കും. ഇന്ത്യയിലെവിടെയും സേവനമനുഷ്ഠിക്കാന്‍ ബാധ്യസ്ഥരാണ്.