തിരുവനന്തപുരം: നെയ്യാറ്റിന്‍കരയിലെ ദമ്പതികളുടെ മക്കളായ രാഹുലിനും രഞ്ജിത്തിനും ലൈഫ് പദ്ധതിയില്‍ പത്തു ലക്ഷം രൂപ ചെലവില്‍ മുന്‍ഗണനാ ക്രമത്തില്‍ വീടുവച്ചുനല്‍കാന്‍ ഇന്നലെ ചേര്‍ന്ന മന്ത്രിസഭാ യോഗം തീരുമാനിച്ചു.
ഇവരുടെ വിദ്യാഭ്യാസ, ജീവിത ആവശ്യങ്ങള്‍ക്കായി മുഖ്യമന്ത്രിയുടെ ദുരിതാശ്വാസനിധിയില്‍നിന്ന് അഞ്ചു ലക്ഷം രൂപ വീതം അനുവദിക്കും. തുക രണ്ടുപേരുടെയും പേരില്‍ ഫിക്‌സഡ് ഡെപ്പോസിറ്റായി നിക്ഷേപിക്കാന്‍ തിരുവനന്തപുരം ജില്ലാ കലക്ടറെ ചുമതലപ്പെടുത്തി.കേരളാ വനിതാ ശിശുക്ഷേമ വകുപ്പിനു കീഴിലുള്ള പദ്ധതിയില്‍ ഉള്‍പ്പെടുത്തി കുട്ടികളുടെ സുരക്ഷിതത്വം ഉറപ്പാക്കാനും മന്ത്രിസഭാ യോഗം തീരുമാനിച്ചു. മരിച്ച ദമ്പതികളുടെ മക്കള്‍ക്കു വീടുവച്ചുനല്‍കാന്‍ ജില്ലാ കലക്ടര്‍ സര്‍ക്കാരിനു നല്‍കിയ റിപ്പോര്‍ട്ടില്‍ ശുപാര്‍ശ ചെയ്തിരുന്നു. കല്ലടിമുഖത്തെ നഗരസഭയുടെ ഫ്‌ളാറ്റോ അല്ലെങ്കില്‍ ലൈഫ് മിഷനില്‍ ഉള്‍പ്പെടുത്തി വീടും സ്ഥലവുമോ നല്‍കാനാണ് കലക്ടര്‍ ശുപാര്‍ശ ചെയ്തിരുന്നത്.
അതേസമയം, സംഭവത്തില്‍ പൊലിസിന് വീഴ്ച പറ്റിയോയെന്നു വ്യക്തമാകാന്‍ അന്വേഷണം തുടങ്ങി. നെയ്യാറ്റിന്‍കര ഡിവൈ.എസ്.പിക്കാണ് അന്വേഷണ ചുമതല. സംഭവത്തില്‍ എത്രയും വേഗം അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ തിരുവനന്തപുരം റൂറല്‍ എസ്.പിക്ക് ഡി.ജി.പി നിര്‍ദേശം നല്‍കിയിരുന്നു. മനുഷ്യാവകാശ കമ്മിഷനും ബാലാവകാശ കമ്മിഷനും ഇതേ ആവശ്യം ഉന്നയിച്ചിട്ടുണ്ട്.നാലാഴ്ചയ്ക്കുള്ളില്‍ അന്വേഷിച്ച് റിപ്പോര്‍ട്ട് സമര്‍പ്പിക്കാനാണ് മനുഷ്യാവകാശ കമ്മിഷന്‍ ആവശ്യപ്പെട്ടിരിക്കുന്നത്. അതേസമയം, കുട്ടികളോട് എങ്ങനെ പെരുമാറി എന്നതിന്റെ റിപ്പോര്‍ട്ടാണ് ബാലാവകാശ കമ്മിഷന്‍ ആവശ്യപ്പെട്ടിരിക്കുന്നത്.