കോഴിക്കോട്: ഓണ്‍ലൈന്‍ പഠനത്തിന് ശേഷം ഇന്ന് വീണ്ടും വിദ്യാര്‍ഥികള്‍ സ്‌കൂളുകളിലെത്തി. ജില്ലയിലെ സ്‌കൂളുകളിലേക്ക് സാമൂഹിക അകലം പാലിക്കുന്നതടക്കമുള്ള മാനദണ്ഡങ്ങള്‍ പാലിച്ചാണ് വിദ്യാര്‍ഥികള്‍ വീണ്ടും സ്‌കൂളിലേക്ക് എത്തിയത്. രാവിലെ 10 മണിയോടെ തന്നെ കുട്ടികള്‍ എത്തിയിരുന്നു. 10,12 ക്ലാസ്സുകളിലെ വിദ്യാര്‍ഥികള്‍ക്കാണ് ഇന്ന് ക്ലാസ് ആരംഭിച്ചിരിക്കുന്നത്. കൊവിഡ് സാഹചര്യത്തില്‍ വിദ്യാര്‍ഥികള്‍ക്ക് മാത്രമാണ് ക്ലാസ് മുറികളില്‍ പ്രവേശനം. സ്‌കൂളുകളില്‍ കവാടത്തില്‍ തന്നെ കൊവിഡ് സെല്ലുകളും പ്രവര്‍ത്തിക്കുന്നുണ്ട്. കഴിഞ്ഞ രണ്ടു ദിവസമായി സ്‌കൂളുകള്‍ പൂര്‍ണമായും അണുവിമുക്തമാക്കിയതിന് ശേഷമാണ് പ്രവേശനം. മാതാപിതാക്കളുടെ അനുമതിപത്രവും പ്രവേശനത്തിന് മാനദണ്ഡമായി നിശ്ചയിച്ചിരുന്നു. ഒരിടവേളക്ക് ശേഷം സ്‌കൂളിലെത്തിയതിന്റെ സന്തോഷത്തിലാണ് വിദ്യാര്‍ത്ഥികള്‍. കുടിക്കാനുള്ള വെള്ളം വീട്ടില്‍ നിന്നും കൊണ്ടുവരണമെന്നും ഉച്ചഭക്ഷണം കൊണ്ടുവരരുത് എന്ന നിര്‍ദ്ദേശവും നല്‍കിയിട്ടുണ്ട്. ഭക്ഷണം കൊണ്ട് വന്ന് പങ്കിട്ട് കഴിക്കാതിരിക്കാനാണിത്. രാവിലെയും ഉച്ചക്കുമായി രണ്ട് ഷിഫ്റ്റുകളായിട്ടാണ് ക്ലാസ് നടക്കുന്നത്. ഒരു ബഞ്ചില്‍ ഒരാള്‍ എന്ന രീതിയിലാണ് ക്ലാസ്. വായും മൂക്കും മൂടുന്ന രീതിയില്‍ മാസ്‌ക് ധരിച്ച് മാത്രമാണ് സ്‌കൂളിലേക്ക് പ്രവേശനം. കുട്ടികള്‍ക്ക് സാനിറ്റൈസര്‍ നിര്‍ബന്ധമാണ്.