തളിപ്പറമ്പ് (കണ്ണൂര്‍): പുതുവര്‍ഷമാഘോഷിക്കാന്‍ ഒത്തുകൂടിയ യുവതിയുള്‍പ്പെടെയുള്ള ഏഴംഗസംഘത്തെ അഞ്ചു ലക്ഷം രൂപ വില മതിക്കുന്ന മാരക മയക്കുമരുന്നുകള്‍ സഹിതം എക്‌സൈസ് സംഘം പിടികൂടി. 

വ്യാഴാഴ്ച രാത്രി ബക്കളത്തെ ഹോട്ടലില്‍ നടന്ന പുതുവത്സരാഘോഷം കഴിഞ്ഞു തിരിച്ചുപോകവേയാണ് ഇന്നലെ രാവിലെ തളിപ്പറമ്പ് റെയിഞ്ച് എക്‌സൈസ് ഇന്‍സ്‌പെക്ടര്‍ എം.ദിലീപിന്റെ നേതൃത്വത്തിലുള്ള സംഘം ഇവരെ പിടികൂടിയത്. 

ബൈക്കില്‍ സഞ്ചരിക്കുകയായിരുന്ന കരിമ്പം സര്‍ സയ്യിദ് ഹയര്‍സെക്കന്‍ഡറി സ്‌കൂളിന് സമീപത്തെ കെ.കെ ഷമീറലി (21), നരിക്കോട്ടെ കെ.ത്വയിബ് (28), ഹബീബ് നഗറിലെ മുഹമ്മദ് ഹനീഫ് (32), മഞ്ചേശ്വരം പച്ചബളയിലെ മുഹമ്മദ് ശിഹാബ് (32), കാസര്‍കോട് മംഗല്‍പാടിയിലെ മുഹമ്മദ് ഷഫീഖ് (22), വയനാട് പനമരത്തെ കെ. ഷഹബാസ് (24), പാലക്കാട് കുടുച്ചിറയിലെ എം. ഉമ (24) എന്നിവരാണ് അറസ്റ്റിലായത്. ഇവര്‍ സഞ്ചരിച്ച ബൈക്കുകളില്‍ നിന്ന് രണ്ടരലക്ഷം രൂപ വിലമതിക്കുന്ന 50 ഗ്രാം എം.ഡി.എം.എ, നാല്‍പതിനായിരം രൂപ വിലമതിക്കുന്ന എല്‍.എസ്.ഡി സ്റ്റാമ്പുകള്‍, അയ്യായിരം രൂപ വില വരുന്ന ഹാഷിഷ് ഓയില്‍ എന്നിവയാണ് പിടിച്ചെടുത്തത്. 

അസി. എക്‌സൈസ് കമ്മിഷണറുടെ സ്‌ക്വാഡിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ തളിപ്പറമ്പ് റെയിഞ്ച് എക്‌സൈസ് സംഘം നടത്തിയ നിരീക്ഷണത്തിലാണ് ഇവര്‍ വലയിലായത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.