പനജി: ഇന്ത്യന്‍ സൂപ്പര്‍ ലീഗില്‍ കേരളാ ബ്ലാസ്റ്റേഴ്‌സ് ഇന്ന് മുംബൈ സിറ്റിയെ നേരിടുന്നു. ജയത്തുടര്‍ച്ചക്ക് വേണ്ടിയാണ് ബ്ലാസ്റ്റേഴ്‌സ് ഇന്ന് ഇറങ്ങുന്നത്. അവസാന മത്സരത്തില്‍ ഹൈദരാബാദ് എഫ്.സിയെ എതിരില്ലാത്ത രണ്ട് ഗോളിന് പരാജയപ്പെടുത്തിയ ബ്ലാസ്റ്റേഴ്‌സിന് ചെറിയ ആത്മവിശ്വസമുണ്ട്. 

പ്രതിരോധ നിരയില്‍ ഇന്ത്യന്‍ താരങ്ങളെ മാത്രം അണിനിരത്തിയായിരുന്നു ബ്ലാസ്റ്റേഴ്‌സ് അവസാന മത്സരത്തിനിറങ്ങിയത്. പ്രതിരോധ താരങ്ങളായ കോനെ, കോസ്റ്റ എന്നിവര്‍ ഇന്നത്തെ മത്സരത്തില്‍ ബ്ലാസ്റ്റേഴ്‌സ് നിരയിലുണ്ടാവുമെന്നാണ് വിവരം. 

സീസണിന്റെ തുടക്കത്തില്‍ മോശം പ്രകടനം കാഴ്ചവെച്ച ബ്ലാസ്റ്റേഴ്‌സ് തിരിച്ചുവരവിനുള്ള ഒരുക്കത്തിലാണ്. നിലവില്‍ ഏഴ് മത്സരത്തില്‍ നിന്ന് ആറു പോയിന്റുമായി ബ്ലാസ്റ്റേഴ്‌സ് പട്ടികയില്‍ ഒമ്പതാം സ്ഥാനത്താണ്. 

തുടര്‍ വിജയങ്ങള്‍ സ്വന്തമാക്കി പ്ലേ ഓഫ് പട്ടികയില്‍ ഇടം നേടുക എന്നതാണ് ഇപ്പോള്‍ ബ്ലാസ്റ്റേഴ്‌സിന് മുന്നിലുള്ള പ്രധാന വെല്ലുവിളി. 

അതേ സമയം ഏഴ് മത്സരത്തില്‍ നിന്ന് 16 പോയിന്റുമായി പട്ടികയില്‍ രണ്ടാം സ്ഥാനത്താണ് മുംബൈ സിറ്റി. കളിച്ച ഏഴ് മത്സരത്തില്‍ ഒരു മത്സരത്തില്‍ മാത്രമേ മുംബൈ പരാജയപ്പെട്ടിട്ടുള്ളു. 

ഒരു മത്സരത്തില്‍ സമനിലയും ബാക്കി അഞ്ചിലും മുംബൈ വിജയക്കൊടി പാറിച്ചിട്ടുണ്ട്. ഏഴ് മത്സരത്തില്‍ 11 ഗോളുകള്‍ സ്വന്തമാക്കാനും മുംബൈ ഇന്ത്യന്‍സി കഴിഞ്ഞിട്ടുണ്ട്. സെര്‍ജിയോ ലെബോറക്ക് കീഴില്‍ മികച്ച ടീമായാണ് ഇത്തവണ മുംബൈ ഇന്ത്യന്‍ എത്തിയിട്ടുള്ളത്.  അതേ സമയം ഏഴ് മത്സരത്തില്‍ നിന്ന് മൂന്ന് തോല്‍വിയും മൂന്ന് സമനിലയും ഒരു ജയവുമാണ് ബ്ലാസ്റ്റേഴ്‌സിന്റെ സമ്പാദ്യം. 

കഴിഞ്ഞ സീസണില്‍ കേരളാ ബ്ലാസ്റ്റേഴ്‌സില്‍ കളിച്ചിരുന്ന ഒഗ്ബച്ചെ ഇന്നത്തെ മത്സരത്തില്‍ മുംബൈ ഇന്ത്യന്‍സിന്റെ ആദ്യ ഇലവനിലുണ്ടാകുമെന്നാണ് വിവരം.