പനജി: ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്‌സിന് തോല്‍വി. രണ്ട് ഗോളിന് മുംബൈ സിറ്റിയാണ് ബ്ലാസ്റ്റേഴ്‌സിനെ പരാജയപ്പെടുത്തിയത്. മത്സരത്തിന്റെ തുടക്കത്തില്‍ തന്നെ മുംബൈ സിറ്റി ഗോള്‍ നേടിയതോടെ ബ്ലാസ്റ്റേഴ്‌സിന് ഇരുട്ടടിയായി.

മൂന്നാം മിനുട്ടില്‍ പെനാല്‍റ്റിയില്‍ നിന്നായിരുന്നു മുംബൈയുടെ ആദ്യ ഗോള്‍ പിറന്നത്. ആദം ലെ ഫോന്ദ്രെയാണ് മുംബൈയുടെ ആദ്യ ഗോള്‍ നേടിയത്. സമനില ഗോളിനായി ബ്ലാസ്റ്റേഴ്‌സ് ശ്രമിക്കുന്നതിനിടെ മുംബൈയുടെ രണ്ടാ ഗോളും പിറന്നു. 11-ാം മിനുട്ടില്‍ ഹ്യൂഗോ ബൗമസാണ് മുംബൈ സിറ്റിയുടെ രണ്ടാം ഗോള്‍ നേടിയത്.

രണ്ടാം ഗോള്‍ വന്നതോടെ ബ്ലാസ്റ്റേഴ്‌സ് പതറി. എങ്കിലും ശക്തമായ നീക്കങ്ങളിലൂടെ ബ്ലാസ്റ്റേഴ്‌സ് മുംബൈയുടെ ഗോള്‍ മുഖത്തെത്തി. രണ്ടാം പകുതിക്കു ശേഷം ഗോള്‍ മടക്കാനായി ആത്മവിശ്വാസത്തോടെയായിരുന്നു ബ്ലാസ്റ്റേഴ്‌സ് കളിച്ചത്. ജയത്തോടെ എട്ട് മത്സരത്തില്‍ നിന്ന് 19 പോയിന്റുള്ള മുംബൈ സിറ്റി പട്ടികയില്‍ ഒന്നാം സ്ഥാനത്തെത്തി. അടുത്ത വ്യാഴാഴ്ച ഒഡിഷ എഫ്.സിക്കെതിരേയാണ് ബ്ലാസ്റ്റേഴ്‌സിന്റെ അടുത്ത മത്സരം.