ടെല്‍അവീവ്: ഇസ്‌റാഈലില്‍ ഫൈസര്‍-ബയോണ്‍ടെക് കൊവിഡ് വാക്‌സിന്‍ കുത്തിവയ്‌പെടുത്ത 240 പേര്‍ക്ക് കൊവിഡ് ബാധിച്ചതായി ചാനല്‍ 13 ന്യൂസ് റിപ്പോര്‍ട്ട് ചെയ്തു. രാജ്യത്ത് 10 ലക്ഷത്തോളം പേര്‍ക്ക് ഇതിനകം ആദ്യ ഡോസ് കുത്തിവച്ചിട്ടുണ്ട്.

വാക്‌സിന്‍ കുത്തിവച്ച ശേഷം നാലുപേര്‍ മരിച്ചതായി കാന്‍ പബ്ലിക് ബ്രോഡ്കാസ്റ്റര്‍ റിപ്പോര്‍ട്ട് ചെയ്തു. ഇതില്‍ മൂന്നുപേരുടെ മരണത്തിന് വാക്‌സിനുമായി ബന്ധമില്ലെന്ന് കുടുംബവും ആരോഗ്യ മന്ത്രാലയവും പറയുന്നു. നാലാമത്തെയാള്‍ ഒരു 88കാരനാണ്. ഇയാളുടെ മരണത്തിന് വാക്‌സിന്‍ കാരണമായോ എന്ന കാര്യം അധികൃതര്‍ അന്വേഷിച്ചുവരുകയാണ്. 

അതേസമയം വാക്‌സിനെടുത്ത 319 പേര്‍ക്കു ക്ഷീണവും പനിയും മോഹാലസ്യവുമുണ്ടായതായി ആരോഗ്യ മന്ത്രാലയം അറിയിച്ചു. അഞ്ചു ശതമാനത്തിന് വയറിളക്കവും 293 പേര്‍ക്ക് ചെറിയ പാര്‍ശ്വഫലങ്ങളുമുണ്ടായി. 14 പേര്‍ക്ക് അലര്‍ജിയും 26 പേര്‍ക്ക് ഞരമ്പുരോഗലക്ഷണങ്ങളുമുണ്ടായി. 

ആദ്യ ഡോസ് അകത്തെത്തി ശരീരം ആന്റിബോഡി വികസിപ്പിക്കാന്‍ ദിവസങ്ങളെടുക്കുമെന്നതിനാല്‍ വാക്‌സിനെടുത്തവരും കൊവിഡ് പ്രോട്ടോകോളുകള്‍ പാലിക്കണമെന്നു ബോധ്യപ്പെടുത്തുന്നതാണ് വാക്‌സിന്‍ കുത്തിവയ്‌പെടുത്തവര്‍ക്ക് കൊവിഡ് ബാധിച്ച സംഭവമെന്ന് വിദഗ്ധര്‍ പറയുന്നു. 21 ദിവസത്തിനു ശേഷമാണ് രണ്ടാമത്തെ ഡോസ് കുത്തിവയ്ക്കുക. 

ആദ്യ ഡോസ് കുത്തിവയ്‌പെടുത്ത് 8-10 ദിവസങ്ങള്‍ക്കു ശേഷമാണ് വൈറസിനെതിരായ പ്രതിരോധശേഷി ശരീരത്തിലുണ്ടാവുകയെന്നാണ് പഠനങ്ങള്‍ പറയുന്നത്. 50 ശതമാനം പ്രതിരോധശേഷിയേ അപ്പോള്‍ ആര്‍ജിക്കാനാവൂ. രണ്ടാമത്തെ ഡോസെടുത്ത് ഒരാഴ്ചയ്ക്കു ശേഷമേ വാക്‌സിന്റെ പൂര്‍ണമായ ഫലപ്രാപ്തിയുണ്ടാവൂ. അതിനാല്‍ തന്നെ ആദ്യ ഡോസെടുത്ത് ഏതാനും ദിവസത്തിനകം വൈറസ് ബാധിക്കുന്നത് അപകടകരമാണെന്നാണ് വിദഗ്ധാഭിപ്രായം. വൈറസിന്റെ ഉപരിതലത്തിലെ പ്രോട്ടീന്‍ തിരിച്ചറിഞ്ഞ് ശരീരം ആന്റിബോഡി നിര്‍മിക്കുന്നതിന് അതിന്റെ ജനിതക കോഡിന്റെ ഒരു ഭാഗം മാത്രമാണ് വാക്‌സിനില്‍ ഉള്‍പ്പെടുത്തിയിരിക്കുന്നതെന്നതിനാല്‍ വാക്‌സിനിലൂടെ വൈറസ് ശരീരത്തിലെത്തില്ലെന്നാണ് വിദഗ്ധാഭിപ്രായമെന്ന് ടൈംസ് ഓഫ് ഇസ്‌റാഈല്‍ റിപ്പോര്‍ട്ടില്‍ പറയുന്നു. 

ലോകത്ത് അതിവേഗം കൂടുതല്‍ പേരില്‍ വാക്‌സിന്‍ കുത്തിവയ്പു നടത്തിയ രാജ്യമാണ് ഇസ്‌റാഈല്‍. ഡിസംബര്‍ 20 മുതല്‍ ഇതുവരെ ജനസംഖ്യയുടെ 10 ശതമാനത്തിന് വാക്‌സിന്‍ കുത്തിവച്ചു. 90 ലക്ഷമാണ് ഇസ്‌റാഈലിലെ ജനസംഖ്യ. രാജ്യത്ത് 4,28,510 പേര്‍ക്ക് കൊവിഡ് ബാധിച്ചു. ഇതില്‍ 3,356 പേരാണ് മരിച്ചത്.