തിരുവനന്തപുരം: സംസ്ഥാനത്തെ കോളജുകളില്‍ കൊവിഡ് പ്രതിസന്ധിക്കിടെ നിര്‍ത്തിവച്ച റഗുലര്‍ ക്ലാസുകള്‍ ഇന്ന് പുനഃരാരംഭിക്കും. സര്‍വകലാശാലാ സെന്ററുകളും പ്രഫഷനല്‍ കോളജുകള്‍ ഉള്‍പ്പെടെയുള്ള മുഴുവന്‍ ഉന്നതവിദ്യാഭ്യാസ സ്ഥാപനങ്ങളും ഇന്നുമുതല്‍ തുറന്നു പ്രവര്‍ത്തിക്കും. കൊവിഡ് മാനദണ്ഡങ്ങള്‍ പാലിച്ചായിരിക്കും ക്ലാസുകള്‍. അവസാന വര്‍ഷ ബിരുദ വിദ്യാര്‍ഥികളും മുഴുവന്‍ ബിരുദാനന്തര ബിരുദ വിദ്യാര്‍ഥികളുമാണ് ക്ലാസിന് എത്തേണ്ടത്. ഒരു സമയം 50 ശതമാനം വിദ്യാര്‍ഥികള്‍ക്കാണ് പ്രവേശനം. ശനിയാഴ്ചയും കോളജുകള്‍ പ്രവര്‍ത്തിക്കും.
പ്രിന്‍സിപ്പല്‍, അധ്യാപകര്‍, അനധ്യാപകര്‍ കഴിഞ്ഞ ദിവസം മുതല്‍ കോളജുകളില്‍ ഹാജരായി. രാവിലെ എട്ടര മുതല്‍ വൈകീട്ട് അഞ്ചര വരെയാണ് കോളജുകളുടെ പ്രവര്‍ത്തനസമയം. പരമാവധി അഞ്ച് മണിക്കൂറായിരിക്കും അധ്യായനം.
ആവശ്യമെങ്കില്‍ രണ്ട് ഷിഫ്റ്റുകളാക്കി അധ്യായനം ക്രമീകരിക്കാനും കോളജുകള്‍ക്ക് സ്വാതന്ത്ര്യം ഉണ്ട്. സെമസ്റ്റര്‍ അടിസ്ഥാനത്തില്‍ 50 ശതമാനം ഹാജറോടെ റൊട്ടേഷന്‍ അടിസ്ഥാനത്തിലാണ് കോളജുകള്‍ പ്രവര്‍ത്തിക്കേണ്ടത്.
വിദ്യാര്‍ഥികള്‍ക്കുള്ള കൊവിഡ് പ്രതിരോധ നിര്‍ദേശങ്ങള്‍ അതത് സര്‍വകലാശാലകളുടെ വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്. കോളജുകളുടെ പ്രവര്‍ത്തനം, മറ്റു ബന്ധപ്പെട്ട കാര്യങ്ങള്‍ എന്നിവ ചര്‍ച്ച ചെയ്യുന്നതിനായി ഉന്നത വിദ്യാഭ്യാസ മന്ത്രി സംസ്ഥാനത്തെ കോളജ് പ്രിന്‍സിപ്പല്‍മാരുമായി വിഡിയോ കോണ്‍ഫറന്‍സ് നടത്തും. ഇന്ന് പകല്‍ രണ്ടിന് സര്‍ക്കാര്‍, എയ്ഡഡ് കോളജ് പ്രിന്‍സിപ്പല്‍മാരുമായും വൈകിട്ട് നാലിന് സ്വാശ്രയ കോളജ് പ്രിന്‍സിപ്പല്‍മാരുമായുമാണ് കോണ്‍ഫറന്‍സ്. ഉന്നത വിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറിയും കോളജ്, സാങ്കേതിക വിദ്യാഭ്യാസ ഡയറക്ടര്‍മാരും പങ്കെടുക്കും.