തിരുവനന്തപുരം: സംസ്ഥാനം കൊവിഡ് വാക്‌സിന്‍ വിതരണത്തിന് പൂര്‍ണമായും സജ്ജമായതായി ആരോഗ്യ മന്ത്രി കെ.കെ ശൈലജ. ഡ്രഗ് കണ്‍ട്രോള്‍ ജനറല്‍ ഓഫ് ഇന്ത്യ കൊവിഡ് വാക്‌സിനുകള്‍ക്ക് അനുമതി നല്‍കിയ സാഹചര്യത്തിലാണ് മന്ത്രിയുടെ പ്രതികരണം. ഏതു വാക്‌സിന്‍ വിതരണം ചെയ്യണമെന്ന് കേന്ദ്ര സര്‍ക്കാര്‍ നിര്‍ദേശിക്കും. അതിനു ശേഷം മാത്രമേ വാക്‌സിന്‍ വിതരണം ചെയ്യാന്‍ സാധിക്കൂ. വാക്‌സിന്‍ വിതരണത്തിനുള്ള ഒരുക്കങ്ങളെല്ലാം പൂര്‍ത്തിയായെന്നും മന്ത്രി പറഞ്ഞു. കൊവിഡ് വാക്‌സിന്‍ വിതരണവുമായി ബന്ധപ്പെട്ട് കഴിഞ്ഞ ദിവസം കേന്ദ്ര സര്‍ക്കാര്‍ നിര്‍ദേശിച്ച ഡ്രൈ റണ്‍ സംസ്ഥാനം വിജയകരമായി പൂര്‍ത്തിയാക്കിയിരുന്നു. വാക്‌സിന്‍ വിതരണം കാര്യക്ഷമമാക്കുന്നതിന്റെ ഭാഗമായായിരുന്നു ഡ്രൈ റണ്‍.