വടകര: കടമേരി ആര്‍.എ.സി സ്‌കൂള്‍ എന്‍.എസ്.എസ് യൂനിറ്റിന്റെ നേതൃത്വത്തില്‍ നടന്ന പുതുതായി തുടങ്ങുന്ന ജൈവപച്ചക്കറിയുടെ നിലമൊരുക്കല്‍ പാറക്കല്‍ അബ്ദുല്ല എം.എല്‍.എ ഉദ്ഘാടനം ചെയ്തു. നേന്ത്ര, മൈസൂര്‍, കദളി തുടങ്ങിയ മുന്നൂറോളം വാഴകളാണ് എന്‍.എസ്.എസ് വളണ്ടിയര്‍മാര്‍ കൃഷി ചെയ്യുന്നത്. 15 വര്‍ഷമായി എന്‍.എസ്.എസ് യൂനിറ്റിന്റെ ആഭിമുഖ്യത്തില്‍ സ്‌കൂളിനോടു ചേര്‍ന്ന രണ്ടേക്കറോളം ഭൂമിയില്‍ വാഴ, ചേമ്പ്, മത്സ്യകൃഷി, ഔഷധ സസ്യങ്ങള്‍, വിവിധ തരം മുളയിനങ്ങള്‍, കള്ളിമുള്‍ച്ചെടികള്‍ തുടങ്ങിയവ ഇപ്പോള്‍ കൃഷി ചെയ്യുന്നുണ്ട്. എന്‍.എസ്.എസ് പ്രോഗ്രാം ഓഫിസര്‍ മുഹമ്മദ് സലീം അടുക്കത്തിന്റെ നേതൃത്വത്തിലാണു കൃഷി നടക്കുന്നത്.
പരിപാടിയില്‍ ആയഞ്ചേരി പഞ്ചായത്ത് പ്രസിഡന്റ് എം.എം നഷീദ, സ്‌കൂള്‍ പ്രിന്‍സിപ്പല്‍ എം.വി അബ്ദുറഹ്മാന്‍, ജമാല്‍ കുറ്റിയില്‍, റസിയ വെള്ളിലാട്ട്, കെ.ടി അബ്ദുറഹ്മാന്‍, അഷ്‌റഫ് വെള്ളിലാട്ട്, എം.പി ഷാജഹാന്‍, ഹാരിസ് മൂച്ചിലോട്ടുമ്മല്‍, സി.സി സാബിത്ത്, മുഹമ്മദലി എം.കെ സംസാരിച്ചു.