ഇ.പി മുഹമ്മദ്
കോഴിക്കോട്
സംസ്ഥാനത്ത് ഡിജിറ്റൽ റീസർവേ അടുത്തമാസം ആരംഭിക്കാനിരിക്കെ വ്യക്തമായ രേഖകളില്ലാത്ത ഭൂമിയിൽ താമസിക്കുന്നവർ ആശങ്കയിൽ. രേഖകൾ ഇല്ലാത്ത ഭൂമി ഡിജിറ്റൽ റീസർവേയിൽ ഉൾപ്പെടുത്തില്ലെന്ന തീരുമാനമാണ് ഇവർക്ക് തിരിച്ചടിയായത്.
കാണം, കുഴിക്കാണം എന്നീ വിഭാഗത്തിലുള്ള ആധാരമുള്ള ഭൂമിയും സർവേ നമ്പർ തെറ്റികിടക്കുന്ന പട്ടയമുള്ളവരുടെ ഭൂമിയും ഡിജിറ്റൽ റീസർവേയിൽ ഉൾപ്പെടുത്തില്ല.
പുറമ്പോക്ക് ഭൂമി കൈവശം വച്ചിരിക്കുന്നവർക്കും അധികഭൂമി കൈവശം വച്ചിരിക്കുന്നവർക്കും ഡിജിറ്റൽ റീസർവേ തിരിച്ചടിയാകും. സംസ്ഥാന സർക്കാരിന്റെ റീബിൽഡ് കേരള ഇനീഷ്യേറ്റീവിൽ ഉൾപ്പെടുത്തി നടപ്പാക്കുന്ന ഡിജിറ്റൽ റീസർവേ നാലുവർഷം കൊണ്ട് പൂർത്തിയാക്കാനാണ് സർക്കാർ ലക്ഷ്യമിടുന്നത്. 807.90 കോടി രൂപയാണ് ഇതിനായി ചെലവ് കണക്കാക്കുന്നത്. ആദ്യഗഡുവായി 339.43 കോടി രൂപ അനുവദിച്ചിട്ടുണ്ട്. സർവേ ഓഫ് ഇന്ത്യ റീജ്യനൽ ഡയറക്ടറുടെ സാങ്കേതിക സഹായത്തോടെ സംസ്ഥാന സർവേ ആൻഡ് ലാൻഡ് റെക്കോഡ്‌സ് വകുപ്പിനാണ് നിർവഹണച്ചുമതല.ഡിജിറ്റൽ റീസർവേ പൂർത്തിയാക്കിയാൽ സംസ്ഥാനത്തെ ഭൂരേഖകൾ ഒറ്റ പോർട്ടലിൽ ലഭ്യമാവും.

അവകാശരേഖ ലഭ്യമാക്കൽ, ഉടമസ്ഥാവകാശം തെളിയിക്കാൻ ഏകീകൃത അവകാശരേഖ, ഓൺലൈൻ സേവനങ്ങൾ, ഭൂമിയുമായി ബന്ധപ്പെട്ട് കാലങ്ങളായി നിൽക്കുന്ന പ്രശ്‌നങ്ങൾ തീർപ്പാക്കൽ, കൃത്യമായ ഭൂരേഖകളും സ്‌കെച്ചുകളും ലഭ്യമാക്കുക എന്നിവയും എളുപ്പമാകും.
1966ൽ ആരംഭിച്ച റീസർവേ നടപടികൾ വർഷങ്ങൾ പിന്നിട്ടിട്ടും പൂർത്തീകരിക്കാൻ കഴിയാത്ത സാഹചര്യത്തിലാണ് സർക്കാർ ഡിജിറ്റൽ ഭൂസർവേയിലേക്ക് കടക്കുന്നത്.
909 വില്ലേജുകളിൽ റീസർവേ പൂർത്തിയായിട്ടുണ്ടെങ്കിലും ഇതിൽ 87 വില്ലേജുകളിലെ രേഖകൾ മാത്രമേ ഡിജിറ്റലൈസ് ചെയ്യാൻ പറ്റുകയുള്ളു. ഡ്രോൺ അടക്കമുള്ള ആധുനിക സങ്കേതിക വിദ്യ ഉപയോഗിച്ചാണ് ഡിജിറ്റൽ റീസർവേ നടത്തുക. മൂന്നു വിധത്തിലുള്ള സർവേയാണ് നടത്തുക. കണ്ടിന്യൂവസ്‌ലി ഓപറേറ്റിങ് റഫറൻസ് സ്‌റ്റേഷൻ (കോർസ്) സ്ഥാപിച്ചും ലിഡാർ എന്ന ത്രിമാന മാപ്പിങ് സംവിധാനം ഡ്രോണിൽ ഘടിപ്പിച്ചും ഇലക്‌്രേടാണിക് ടോട്ടൽ സ്‌റ്റേഷൻ വഴിയുമാണ് സർവേ നടത്തുക.
28 കോർസ് നെറ്റ്‌വർക്ക് സ്‌റ്റേഷനുകൾ ആരംഭിക്കുന്നതിനുള്ള ടെൻഡർ നടപടികൾ പൂത്തിയായി. ഒരു ജില്ലയിൽ ഇത്തരത്തിലുള്ള മൂന്നു സ്‌റ്റേഷനുകൾ വരെയുണ്ടാവും. 40 ശതമാനം സർവേയാണ് ഇതുവഴി നടത്തുക. ടോട്ടൽ സ്‌റ്റേഷൻ ഉപയോഗിച്ച് 40 ശതമാനം സർവേയും ഡ്രോൺ ഉപയോഗിച്ച് ബാക്കിയുള്ള 20 ശതമാനം സർവേയും നടത്തും. ഒരു ടീമിന് നാല് ഹെക്ടർവരെ ഒരേ സമയം റീസർവേ ചെയ്യാനാകും.