ടുറിന്‍: ലോക ഫുട്‌ബോളില്‍ തന്റെ രാജകീയ സിംഹാസനം ഒരിക്കല്‍കൂടി ഊട്ടിയുറപ്പിച്ച് ക്രിസ്റ്റ്യാനോ റൊണാള്‍ഡോ. ബ്രസീലിയന്‍ ഫുട്‌ബോള്‍ ഇതിഹാസം പെലെയുടെ റെക്കോഡാണ് റൊണാള്‍ഡോ കഴിഞ്ഞ ദിവസം മറികടന്നത്. ക്ലബിനും രാജ്യത്തിനും ഏറ്റവും കൂടുതല്‍ ഗോള്‍ നേടുന്ന താരമെന്ന പെലെയുടെ റെക്കോര്‍ഡാണ് ക്രിസ്റ്റ്യാനോ മറികടന്നത്. ഉഡിനീസിനെതിരായ മത്സരത്തില്‍ ഇരട്ട ഗോളുകള്‍ നേടിയതോടെ റൊണാള്‍ഡോയുടെ കരിയര്‍ ഗോളുകളുടെ എണ്ണം 758 ആയി. 757 ഗോളുകളാണ് പെലെയുടെ പേരിലുള്ള കരിയര്‍ ഗോളുകള്‍.
2002 മുതല്‍ തുടങ്ങിയ സീനിയര്‍ കരിയറില്‍ നിന്നാണ് ക്രിസ്റ്റിയാനോ റൊണാള്‍ഡോ ഇത്രയും ഗോള്‍ സ്വന്തമാക്കിയത്. 656 ക്ലബ്ബ് ഗോളുകള്‍ നേടിയതില്‍ 450 ഗോളും റയല്‍ മാഡ്രിഡിനൊപ്പമായിരുന്നു ക്രിസ്റ്റ്യാനോ സ്വന്തമാക്കിയത്. 2009-18വരെയാണ് അദ്ദേഹം റയലിനായി ബൂട്ടണിഞ്ഞത്. പോര്‍ച്ചുഗല്ലിനായി 120 മത്സരത്തില്‍ നിന്ന് 102 ഗോളുകളാണ് റൊണാള്‍ഡോ നേടിയത്. ആസ്‌ട്രേലിയന്‍ ഫുട്‌ബോളറായ ജോസഫ് ബയ്കണ്‍ മാത്രമാണ് ഇനി കരിയര്‍ ഗോളുകളുടെ കാര്യത്തില്‍ ക്രിസ്റ്റ്യാനോക്ക് മുന്നിലുള്ളത്.
ദേശീയ ടീമിനൊപ്പം കൂടുതല്‍ ഗോളെന്ന റെക്കോഡില്‍ ഇറാന്റെ മുന്‍ താരം അലി ഡെയിയേക്കാള്‍ ഏഴ് ഗോള്‍ മാത്രം പിന്നിലാണ് റൊണാള്‍ഡോയുള്ളത്. റൊണാള്‍ഡോയുടെ കൂടുതല്‍ ഗോളെന്ന റെക്കോഡിനൊപ്പമെത്താന്‍ നിലവില്‍ 16 ഗോള്‍ മെസ്സിക്ക് വേണം. റൊണാള്‍ഡോയേക്കാള്‍ 200 മത്സരങ്ങള്‍ കുറവാണ് മെസ്സി കളിച്ചിരിക്കുന്നത്. ഫുട്‌ബോള്‍ ഇതിഹാസമായ പെലെ ബ്രസീല്‍,സാന്റോസ്, ന്യൂയോര്‍ക്ക് കോസ്‌മോസ് ടീമുകള്‍ക്കുവേ@ണ്ടി കളിച്ചാണ് 757 ഗോളുകള്‍ നേടിയത്. 1956-1977 വരെയുള്ള കരിയര്‍ കാലഘട്ടത്തിലായിരുന്നു പെലെ ഇത്രയും ഗോള്‍ സ്വന്തമാക്കിയത്. സ്‌പോര്‍ട്ടിങ്ങിലൂടെയായിരുന്നു ക്രിസ്റ്റ്യാനോ റൊണാള്‍ഡോയുടെ തുടക്കം.