കൊച്ചി: കൊച്ചിയില്‍ ഓടിക്കൊണ്ടിരുന്ന കാറിന് തീപിടിച്ചു. കാറ് പൂര്‍ണമായും കത്തിനശിച്ചിട്ടുണ്ട്. അരൂര്‍ സ്വദേശിയായ മാര്‍ട്ടിന്‍ ഓടിച്ചിരുന്ന കാറാണ് കത്തിയത്. വൈറ്റില പാലത്തിന് താഴെയാണ് അപകടം.

വാഹനത്തിന്റെ ബാറ്ററിയുടെ ഭാഗത്ത് നിന്നാണ് തീപടര്‍ന്നത്. ഷോട്ട് സര്‍ക്യൂട്ടാണ് തീപിടിക്കാന്‍ കാരണമെന്ന് കരുതുന്നു. വാഹനത്തിന് തീപിടിക്കുന്നത് ശ്രദ്ധയില്‍പെട്ടപ്പോള്‍ മാര്‍ട്ടിന്‍ വാഹനത്തില്‍ നിന്ന് ചാടിയതിനാല്‍ പരുക്കേല്‍കാതെ രക്ഷപ്പെട്ടു.

ഫയര്‍ഫോഴ്സിനെ വിവരമറിയിച്ചെങ്കിലും വാഹനം പൂര്‍ണമായും തീപിടിച്ചശേഷമാണ് എത്തിയത്. ഗാന്ധിനഗര്‍, തൃപ്പൂണിത്തുറ എന്നിവിടങ്ങളില്‍ നിന്ന് രണ്ട് യൂനിറ്റ് ഫയര്‍ഫോഴ്സ് സ്ഥലത്തെത്തി. പൊലിസും സംഘവും സ്ഥലത്തെത്തി സ്ഥിതിഗതികള്‍ വിലയിരുത്തി. തിരക്കേറിയ സമയമായിരുന്നതിനാല്‍ വന്‍ ഗതാഗതക്കുരുക്കാണ് വൈറ്റില ജങ്ഷനിലുണ്ടായത്.