തിരുവനന്തപുരം
ദേശീയതലത്തിലെ രാഷ്ട്രീയസാഹചര്യങ്ങൾ മുൻനിർത്തി ബി.ജെ.പിക്കെതിരായ ബദലിന് കോൺഗ്രസുമായുള്ള സഹകരണം വേണമെന്ന നിലപാട് ആവർത്തിച്ച് മുതിർന്ന സി.പി.ഐ നേതാവും രാജ്യസഭാംഗവുമായ ബിനോയ് വിശ്വം. കേരളമല്ല ഇന്ത്യയെന്നും രാജ്യത്തിന്റെ യാഥാർഥ്യം മറ്റൊന്നാണെന്നും കോൺഗ്രസുമായുള്ള സഹകരണം ആവശ്യമാണെന്നും ബിനോയ് വിശ്വം അഭിപ്രായപ്പെട്ടു. ഇത് സംബന്ധിച്ച ബിനോയിയുടെ നിലപാട് സി.പി.ഐയും സി.പി.എമ്മും തമ്മിലുള്ള തർക്കമായി മാറിയിരിക്കെയാണ് ഇന്നലെ ഒരു മലയാള ദിനപത്രത്തിലെഴുതിയ ലേഖനത്തിൽ അദ്ദേഹം തന്റെ വാദം ആവർത്തിച്ച് വ്യക്തമാക്കിയത്.

കോൺഗ്രസിന്റെ സാമ്പത്തികനയങ്ങളോട് ഇടതുപക്ഷത്തിന് തീർച്ചയായും വിയോജിപ്പുണ്ട്. ബാബറി മസ്ജിദിന്റെ തകർച്ചയ്ക്ക് വഴിയൊരുക്കിയ മൃദുഹിന്ദുത്വ സമീപനത്തോടും അതേ വിയോജിപ്പുകളുണ്ട്. എന്നാൽ, കോൺഗ്രസിനെയും ഫാസിസ്റ്റ് ആശയങ്ങളുടെ രാഷ്ട്രീയകുന്തമുനയായ ബി.ജെ.പിയെയും ഒരുപോലെ കാണാൻ ഇടതുപക്ഷദർശനം അനുവദിക്കുന്നില്ല.

രാഷ്ട്രീയപോരാട്ടത്തിന്റെ നിർണായകഘട്ടങ്ങളിൽ രണ്ട് മുഖ്യശത്രുക്കൾ ഉണ്ടാകുന്നത് സമരവിജയത്തെ പ്രതികൂലമായി ബാധിക്കും.

കോൺഗ്രസ് തകർച്ചയുണ്ടാക്കിയ ശൂന്യതയിലേക്ക് കടന്നുവരുന്നത് ബി.ജെ.പിയാണ്. അതുകൊണ്ടാണ് ഫാസിസത്തെ ഒന്നാം നമ്പർ ശത്രുവായി കാണുന്ന ഇടതുപക്ഷം കോൺഗ്രസ് തകരരുത് എന്നാഗ്രഹിക്കുന്നത്- ബിനോയ് വ്യക്തമാക്കി.നെഹ്‌റുവിന്റെ സ്ഥാനത്തേക്ക് മറ്റാരെയെങ്കിലും പ്രതിഷ്ഠിക്കാനുള്ള തീവ്രവലതുപക്ഷ ശ്രമങ്ങളെ ചെറുത്തുതോൽപ്പിക്കണം. നെഹ്‌റുവിനോട് യോജിക്കുകയോ വിയോജിക്കുകയോ ചെയ്യാം.
പക്ഷേ, ഇന്ത്യയെ കണ്ടെത്താൻ നെഹ്‌റു നടത്തിയ ആത്മാർഥ ഇടപെടലുകളെ അവഗണിക്കാനാവില്ല. ഇടതുപക്ഷവും നെഹ്‌റുവും തമ്മിൽ കലഹിച്ച സന്ദർഭങ്ങൾ വിരളമല്ല. എന്നാൽ, ചരിത്രത്തിലെ നെഹ്‌റുവിന്റെ സ്ഥാനം തുടച്ചുമാറ്റി അവിടെ മറ്റാരെയെങ്കിലും പ്രതിഷ്ഠിക്കാനുള്ള തീവ്രവലതുപക്ഷ നീക്കങ്ങളോട് സന്ധിചെയ്യാൻ ഇടതുപക്ഷത്തിനാവില്ല.

നെഹ്‌റു ജീവിതംകൊടുത്ത പാർട്ടി അദ്ദേഹത്തെ വിസ്മരിക്കുകയായിരുന്നു. അവിടെനിന്നാരംഭിക്കുന്നു കോൺഗ്രസിന്റെ അധഃപതനമെന്നും അദ്ദേഹം എഴുതി.