കോഴിക്കോട്: കേരള മദ്യനിരോധനസമിതി മലബാര്‍ മേഖലാ കണ്‍വന്‍ഷന്‍ 20ന് ഉച്ചയ്ക്ക് 2.30ന് ഗാന്ധിഗൃഹത്തില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. അഖിലേന്ത്യാ മദ്യനിരോധനസമിതി അധ്യക്ഷന്‍ ഡോ. രജനിഷ്‌കുമാര്‍ ഉദ്ഘാടനം ചെയ്യും. മുന്‍ എം.പി ഡോ. രാംജിസിങ് മുഖ്യാതിഥിയാകും. സംസ്ഥാന സര്‍ക്കാരിന്റെ ലഹരിവിരുദ്ധ ബോധവല്‍ക്കരണ പരിപാടികളില്‍ സഹകരിക്കുക, സമ്പൂര്‍ണ മദ്യനിരോധനത്തിന് സമര സജ്ജരാവുക എന്ന സംഘടനാ പ്രമേയം കണ്‍വന്‍ഷനില്‍ വിശദീകരിക്കും. മദ്യവര്‍ജനമെന്ന സര്‍ക്കാര്‍ നയം അപകടകരമാണെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.  ഇയ്യച്ചേരി കുഞ്ഞികൃഷ്ണന്‍, ജില്ലാ പ്രസിഡന്റ് സി. ചന്തുക്കുട്ടി,  കെ.ജി രാധാകൃഷ്ണന്‍, പപ്പന്‍ കന്നാട്ടി പങ്കെടുത്തു.