കോഴിക്കോട്: മലപ്പുറം ജില്ലയിലെ പൂക്കിപ്പറമ്പില്‍ പൊതുയോഗത്തില്‍ പങ്കെടുത്തതിന്റെ പേരില്‍ സമസ്ത ഇസ്‌ലാം മത വിദ്യാഭ്യാസ ബോര്‍ഡ് എക്‌സിക്യൂട്ടീവ് മെമ്പറും സുന്നി യുവജന സംഘം സംസ്ഥാന സെക്രട്ടറിയുമായ അബ്ദുസ്സമദ് പൂക്കോട്ടൂര്‍, സമസ്ത കേരള ജംഇയ്യത്തുല്‍ മുഅല്ലിമീന്‍ സെന്‍ട്രല്‍ കൗണ്‍സില്‍ വൈസ്പ്രസിഡന്റ് അബ്ദുല്‍ ഖാദര്‍ അല്‍ഖാസിമി, സിദ്ദീഖ് ഫൈസി വാളക്കുളം, ശൈഖ് അലി മുസ്‌ല്യാര്‍ ഉള്‍പ്പെടെയുള്ള നേതാക്കള്‍ക്കും പ്രവര്‍ത്തകര്‍ക്കുമെതിരേ കേസെടുത്ത തിരൂരങ്ങാടി പൊലിസ് നടപടിയില്‍ സമസ്ത കേരള ഇസ്‌ലാം മത വിദ്യഭ്യാസ ബോര്‍ഡ് നിര്‍വാഹക സമിതി യോഗം ശക്തമായ പ്രതിഷേധം രേഖപ്പടുത്തി.
ലക്ഷദ്വീപിലെ സ്‌കൂള്‍ പഠന സമയം നേരത്തെയാക്കിയത് കാരണം വിദ്യാര്‍ഥികളുടെ മദ്‌റസ പഠനത്തെ ബാധിക്കും അതിനാല്‍ സമയമാറ്റ നടപടി പിന്‍വലിക്കണം. മാത്രമല്ല നിലവിലുള്ള പ്രവൃത്തി ദിനത്തില്‍ നിന്ന് വ്യത്യസ്തമായി വെള്ളിയാഴ്ച സ്‌കൂള്‍ പ്രവൃത്തി ദിനമാക്കിയതും കൊവിഡിന്റെ മറവില്‍ ജുമുഅ നിസ്‌കാരം നിഷേധിച്ചതും ഉള്‍പ്പെടെയുള്ള നടപടികള്‍ പുനപ്പരിശോധിക്കണമെന്നും യോഗം പ്രമേയത്തില്‍ ആവശ്യപ്പെട്ടു.
പ്രസിഡന്റ് പി.കെ മൂസക്കുട്ടി ഹസ്രത്ത് അധ്യക്ഷനായി. സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയത്തങ്ങള്‍ ഉദ്ഘാടനം ചയ്തു. വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ല്യാര്‍ സ്വാഗതം പറഞ്ഞു. പ്രൊഫ.കെ ആലിക്കുട്ടി മുസ്‌ല്യാര്‍, പി.പി ഉമ്മര്‍, കൊയ്യോട് കെ.ടി ഹംസ മുസ്‌ല്യാര്‍, കെ. ഉമ്മര്‍ ഫൈസി മുക്കം, എ.വി അബ്ദുറഹ്മാന്‍ മുസ്‌ല്യാര്‍, ഡോ. ബഹാവുദ്ദീന്‍ മുഹമ്മദ് നദ്‌വി കൂരിയാട്, ഡോ.എന്‍.എ.എം അബ്ദുല്‍ ഖാദര്‍, വാക്കോട് മൊയ്തീന്‍ കുട്ടി ഫൈസി, എം.പി.എം ശരീഫ് കുരിക്കള്‍, എം.സി മായിന്‍ ഹാജി, കെ.എം അബ്ദുല്ല കൊട്ടപ്പുറം, അബ്ദുല്‍ ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂര്‍, ഇ. മൊയ്തീന്‍ ഫൈസി പുത്തനഴി, ഇസ്മായില്‍കുഞ്ഞുഹാജി മാന്നാര്‍, എന്‍. സഈദ് മുസ്‌ല്യാര്‍ വിഴിഞ്ഞം,കൊടക് അബ്ദുറഹ്മാന്‍ മുസ്‌ല്യാര്‍ സംസാരിച്ചു. ജനറല്‍ മാനേജര്‍ കെ. മോയിന്‍കുട്ടി നന്ദി പറഞ്ഞു