കോഴിക്കോട്: വാഹനാപകടങ്ങള്‍ സംബന്ധിച്ച ബോധവല്‍ക്കരണത്തിനായി മോട്ടോര്‍ വാഹന വകുപ്പ് ആവിഷ്‌കരിച്ച 'നേര്‍വഴി പദ്ധതിക്ക് ' ജില്ലയില്‍ തുടക്കമായി. സില്‍വര്‍ ഹില്‍സ് എച്ച്.എസ്.എസില്‍ നടന്ന ചടങ്ങില്‍ ഗതാഗത വകുപ്പ് മന്ത്രി എ.കെ ശശീന്ദ്രന്‍ ഉദ്ഘാടനം ചെയ്തു. ഇരുചക്രവാഹന യാത്രികര്‍ ഹെല്‍മറ്റ് ധരിക്കണമെന്നത് നിയമപരമായ ബാധ്യതയാണ്. ബോധവല്‍ക്കരണത്തിലൂടെ ഗതാഗതനിയമങ്ങള്‍ പാലിക്കാനുള്ള ശീലം വളര്‍ത്തിയെടുക്കുകയാണ് ലക്ഷ്യം. ഇതിനായി ജില്ലയിലെ 64 ഹയര്‍ സെക്കന്‍ഡറി സ്‌കൂളുകളിലും രണ്ടു മാസത്തിനുള്ളില്‍ ബോധവല്‍ക്കരണ പരിപാടികള്‍ സംഘടിപ്പിക്കുമെന്നും മന്ത്രി പറഞ്ഞു.
സംസ്ഥാനത്ത് ഓരോ വര്‍ഷവും പുതുതായി നിരത്തിലിറങ്ങുന്ന വാഹനങ്ങളുടെ എണ്ണം 10 ശതമാനം വര്‍ധിക്കുന്നുണ്ടെന്ന് വിഷയാവതരണം നടത്തിയ ട്രാന്‍സ്‌പോര്‍ട്ട് കമ്മിഷണര്‍ ടോമിന്‍ ജെ. തച്ചങ്കരി പറഞ്ഞു. വാഹനങ്ങള്‍ വര്‍ധിക്കുന്നതിനനുസരിച്ച് റോഡ് വര്‍ധിക്കുന്നില്ലെന്നും അദ്ദേഹം വ്യക്തമാക്കി. എ. പ്രദീപ് കുമാര്‍ എം.എല്‍.എ അധ്യക്ഷനായി. ജില്ലാ വിദ്യാഭ്യാസ ഡയരക്ടര്‍ ഡോ. ഗിരീഷ് ചോലയില്‍, വാര്‍ഡ് അംഗം ബിജുലാല്‍, ട്രാന്‍സ്‌പോര്‍ട്ട് ഡെപ്യൂട്ടി കമ്മീഷണര്‍ ബി.ജെ ആന്റണി, സ്‌കൂള്‍ പ്രിന്‍സിപ്പല്‍ ഫാ. ബിജു ജോണ്‍ വെള്ളക്കട, റീജ്യനല്‍ ട്രാന്‍സ്‌പോര്‍ട്ട് ഓഫിസര്‍ സി.ജെ പോള്‍സണ്‍, സ്‌കൂള്‍ മാനേജര്‍ സെബാസ്റ്റ്യന്‍, പി.ടി.എ പ്രസിഡന്റ് തങ്കച്ചന്‍ സംസാരിച്ചു.