സുരേഷ് മമ്പള്ളി
കണ്ണൂർ
കാംപസുകൾ കൊലക്കളങ്ങളാകുമ്പോൾ തീയാളുന്നത് മക്കളെ പഠിക്കാൻവിട്ട മാതാപിതാക്കളുടെ നെഞ്ചിലാണ്. സംസ്ഥാനത്ത് നാലുവർഷത്തിനിടെ രണ്ടാമത്തെ കാംപസ് കൊലപാതകമാണ് ഇന്നലെ ഇടുക്കിയിൽ നടന്നത്. 2018 ജൂലൈ രണ്ടിനായിരുന്നു എറണാകുളം മഹാരാജാസ് കോളജ് വിദ്യാർഥിയും എസ്.എഫ്.ഐ ഇടുക്കി ജില്ലാ കമ്മിറ്റി അംഗവുമായ അഭിമന്യു(20) കാംപസിൽ എസ്.ഡി.പി.ഐ പ്രവർത്തകരുടെ കുത്തേറ്റ് മരിച്ചത്. ഏറെ ദരിദ്രമായ കുടുംബ പശ്ചാത്തലമായിരുന്നു അഭിമന്യുവിന്റേത്.
സമാനമായ സാഹചര്യമാണ് തളിപ്പറമ്പ് പാലക്കുളങ്ങര സ്വദേശി ധീരജിന്റേതും. രണ്ടു വർഷം മുമ്പുവരെ വാടകവീട്ടിലായിരുന്നു ധീരജും കുടുംബവും കഴിഞ്ഞിരുന്നത്. തൃച്ചംബരം യു.പി സ്‌കൂളിന് സമീപം ഒന്നര വർഷം മുമ്പാണ് ''''അദ്വൈതം'''' എന്ന പുതിയ വീടുവച്ചത്. എൽ.ഐ.സി ഏജന്റായ പിതാവ് രാജേന്ദ്രന് മറ്റു വരുമാനമാർഗങ്ങളൊന്നുമില്ല. തിരുവനന്തപുരം പാലോട് സ്വദേശിയാണ് രാജേന്ദ്രൻ.

നാട്ടിൽ സജീവ രാഷ്ട്രീയപ്രവർത്തകനായിരുന്നില്ല ധീരജ്. ധീരജിന്റെ മാതാപിതാക്കളും രാഷ്ട്രീയത്തിൽ സജീവമല്ല. കോളജിൽ സജീവ എസ്.എഫ്.ഐ പ്രവർത്തകനായിരുന്നു ധീരജ് എന്ന കാര്യം മാതാപിതാക്കൾക്ക് അറിയില്ലായിരുന്നു.ധീരജ് കൊലക്കത്തിക്ക് ഇരയാകുമ്പോൾ പുഷ്പകല തളിപ്പറമ്പ് ആയുർവേദ ആശുപത്രിയിൽ ഡ്യൂട്ടിയിലായിരുന്നു. ബന്ധുക്കൾ ആശുപത്രിയിലെത്തി വീട്ടിലേക്ക് കൂട്ടിക്കൊണ്ടുവന്ന ശേഷമാണ് മരണവിവരം അറിയിച്ചത്. മകൻ ഇനിയില്ലെന്നറിഞ്ഞതോടെ അലമുറയിട്ടു കരയുകയായിരുന്നു ആ അമ്മ. പഠനത്തിൽ മിടുക്കനായിരുന്നു ധീരജ്.
നാട്ടുകാർക്കും അയൽവാസികൾക്കുമെല്ലാം ഏറെ പ്രിയങ്കരനായ ധീരജിന്റെ കൊലപാതക വാർത്തയിൽ വിറങ്ങലിച്ച് നിൽക്കുകയാണ് ജന്മനാട്.