പാലക്കാട്: പുതുപ്പരിയാരത്ത് ദമ്പതികളെ വീട്ടിനുള്ളില്‍ കൊല്ലപ്പെട്ട നിലയില്‍ കണ്ടെത്തിയ കേസില്‍ മൂത്ത മകന്‍ പൊലീസ് കസ്റ്റഡിയില്‍. രാവിലെ ഓട്ടോയില്‍ പുതുപ്പരിയാരത്തെ വീടിന് സമീപം എത്തിയ സനലിനെ നാട്ടുകാരാണ് തടഞ്ഞുവച്ച് പൊലീസില്‍ ഏല്‍പ്പിച്ചത്. ഓട്ടൂര്‍ക്കാട് സ്വദേശി ചന്ദ്രനെയും ഭാര്യ ദേവിയെയും മകന്‍ സനല്‍ കൊലപ്പെടുത്തിയെന്നാണ് പൊലീസ് നിഗമനം.

ഞായറാഴ്ച്ച രാത്രി ഒന്‍പത് വരെ സനല്‍ വീട്ടിലുണ്ടായിരുന്നു. തുടര്‍ന്ന് സംഭവത്തിന് ശേഷം ഇയാള്‍ ഒളിവിലായിരുന്നു.

സാമ്പത്തിക, ഭൂമി ഇടപാടിനെച്ചൊല്ലിയുള്ള തര്‍ക്കത്തിനിടെ ഇരുവരെയും കൊലപ്പെടുത്തിയെന്നാണ് സനല്‍ പൊലീസിന് നല്‍കിയിരിക്കുന്ന പ്രാഥമിക മൊഴി. കൊലയ്ക്ക് ശേഷം സനല്‍ കര്‍ണാടകയിലേക്ക് കടന്നുവെന്നായിരുന്നു പൊലീസ് നിഗമനം. സനലിനെ ആലത്തൂര്‍ ഡിവൈഎസ്പി ഓഫിസിലെത്തിച്ച് പൊലീസ് വിശദമായി ചോദ്യം ചെയ്യുന്നു.