സ്വന്തം ലേഖകൻ
കോഴിക്കോട്
ഇടതുസർക്കാരിന്റെ പൊലിസ് നയത്തിനേതിരേയും കെ റെയിൽ പദ്ധതിക്കെതിരേയും സി.പി.എം ജില്ലാ സമ്മേളനത്തിൽ രൂക്ഷവിമർശനം. അലൻ ഷുഹൈബ്, താഹ ഫസൽ എന്നിവർക്കെതിരേയുള്ള യു.എ.പി.എ കേസ് ചൂണ്ടിക്കാട്ടിയാണ് ആഭ്യന്തര വകുപ്പിനെതിരേ മുഖ്യമന്ത്രിയുടെ സാന്നിധ്യത്തിൽ പ്രതിനിധികൾ വിമർശനം ഉന്നയിച്ചത്. യു.എ.പി.എ ചുമത്താൻ മാത്രം അവർ കുറ്റം ചെയ്തിരുന്നോ എന്ന് പ്രതിനിധികൾ ചോദിച്ചു. യു.എ.പി.എ കേരളത്തിൽ ഇങ്ങനെ നടപ്പാക്കേണ്ടതുണ്ടോ എന്നും വിമർശനം ഉയർന്നു.
യു.എ.പി.എ വിഷയത്തിൽ ദേശീയതലത്തിൽ എടുത്ത നിലപാട് എന്തുകൊണ്ട് പന്തീരാങ്കാവ് കേസിൽ ഉണ്ടായില്ലെന്നും ചോദ്യമുണ്ടായി. കേസുമായി മുന്നോട്ട് പോയതും അതിനെ ന്യായീകരിക്കേണ്ടി വന്നതും പ്രവർത്തകർക്കിടയിൽ ആശയക്കുഴപ്പം ഉണ്ടാക്കിയെന്ന് ഫറോക്കിൽനിന്നുള്ള പ്രതിനിധി ചൂണ്ടിക്കാട്ടി. പൊലിസിൽനിന്ന് നീതി ലഭിക്കുന്നില്ലെന്നും ചിലർ ചൂണ്ടിക്കാട്ടി.

പാർട്ടിയുടെ പ്രാദേശിക നേതാക്കളോട് പൊലിസ് വളരെ മോശമായാണ് പെരുമാറുന്നത്. ഇക്കാര്യം പലതവണ ചൂണ്ടിക്കാട്ടിയിട്ടും തിരുത്താൻ തയാറാകുന്നില്ല. പാർട്ടി പ്രവർത്തകരെ ചെയ്യാത്ത കുറ്റത്തിന് പ്രതി ചേർക്കുന്ന സാഹചര്യമുണ്ടെന്ന് പേരാമ്പ്രയിൽനിന്നുള്ള പ്രതിനിധി വിമർശനം ഉയർത്തി.

നിയമസഭാ തെരഞ്ഞെടുപ്പിൽ വടകരയിലുണ്ടായ തോൽവിയിൽ അന്വേഷണം വേണം. പ്രാദേശിക നേതൃത്വത്തിന് വലിയ വീഴ്ച പറ്റിയിട്ടുണ്ട്. വടകരയിലെ പാർട്ടി ഘടകങ്ങൾ നൽകിയ വോട്ടുകണക്കുകൾ എല്ലാം തെറ്റിയെന്നും വിമർശനമുണ്ടായി. കുറ്റ്യാടിയിലെ പൊട്ടിത്തെറി ഒഴിവാക്കാമായിരുന്നുവെന്ന് പേരാമ്പ്രയിലെ പ്രതിനിധികൾ ചൂണ്ടിക്കാട്ടി.

2016ൽ കുറ്റ്യാടിയിൽ തോറ്റപ്പോൾ തന്നെ നടപടി എടുത്തിരുന്നെങ്കിൽ സ്ഥാനാർഥി നിർണയത്തെച്ചൊല്ലി ഇത്തവണയുണ്ടായ പ്രശ്‌നങ്ങൾ ഒഴിവാക്കാമായിരുന്നുവെന്നും ജില്ലാ നേതൃത്വത്തിന് ഇക്കാര്യത്തിൽ വീഴ്ച പറ്റിയെന്നും വിമർശനങ്ങൾ ഉയർന്നു.മറ്റു ജില്ലകളിലെ പോലെ കെ റെയിൽ നടപ്പാക്കണം എന്നാശ്യപ്പെട്ടുള്ള പ്രമേയം പാസാക്കിയാണ് സമ്മേളനം തുടങ്ങിയതെങ്കിലും കോഴിക്കോട് സൗത്തിലേയും കൊയിലാണ്ടിയിലേയും സമ്മേളന പ്രതിനിധികൾ പദ്ധതിയെ വിമർശിച്ചു. ദേശീയപാതയ്ക്ക് വേണ്ടി സ്ഥലമേറ്റെടുത്തതിൽ തന്നെ പലതരം പ്രശ്‌നങ്ങളുണ്ടെന്നും ഇതേ നിലയിലാണ് കെ റെയിലിന് വേണ്ടി സ്ഥലമേറ്റെടുക്കുന്നതെങ്കിൽ കടുത്ത തിരിച്ചടിയുണ്ടാവുമെന്നും വിമർശനമുയർന്നു. മുഖ്യമന്ത്രി പിണറായി വിജയനെയും സംസ്ഥാന സെക്രട്ടറി കോടിയേരി ബാലകൃഷ്ണനെയും വേദിയിലിരുത്തിയാണ് പ്രതിനിധികൾ വിമർശനം ഉന്നയിച്ചത്. വൈകിട്ട് ജില്ലാ സെക്രട്ടറി പി. മോഹനനും മുഖ്യമന്ത്രി പിണറായി വിജയനും ചർച്ചയ്ക്ക് മറുപടി പറഞ്ഞു. അതേസമയം, പന്തീരാങ്കാവ് യു.എ.പി.എ കേസിൽ ജില്ലാ സെക്രട്ടറി പി. മോഹനൻ നിലപാട് ആവർത്തിച്ചു. അലനും താഹക്കും തെറ്റുപറ്റിയെന്ന് അദ്ദേഹം പറഞ്ഞു.