സ്വന്തം ലേഖകൻ
കൊച്ചി
യുവനടി ആക്രമിക്കപ്പെട്ട കേസിൽ ദിലീപിനൊപ്പം ഗൂഢാലോചനയിൽ ഉൾപ്പെടെ പങ്കെടുത്ത വി.ഐ.പിയെ തേടി ക്രൈംബ്രാഞ്ച്. നടി ആക്രമിക്കപ്പെട്ട ദൃശ്യങ്ങൾ അടങ്ങിയ മെമ്മറി കാർഡ് ദിലീപിനെ ഏൽപിച്ചത് ഈ വി.ഐ.പി ആണെന്നതുൾപ്പെടെ സംവിധായകൻ ബാലചന്ദ്രകുമാർ നേരത്തെ വ്യക്തമാക്കിയിരുന്നു. ഇയാളുടെ വേഷം ഖദർ മുണ്ടും ഷർട്ടുമാണെന്നും ഇയാൾ ആലുവയിലെ ഉന്നതനാണെന്നും രാഷ്ട്രീയ പ്രവർത്തകനാകാമെന്നും ബാലചന്ദ്രകുമാർ വെളിപ്പെടുത്തിയ പശ്ചാത്തലത്തിൽ പല സംശയങ്ങളും പലരിലേക്കും ഉയർന്നു.

അന്വേഷണത്തിന്റെ ഭാഗമായി ചില ശബ്ദരേഖകളും ഫോട്ടോകളും പൊലിസ് കാണിച്ചുവെന്നും ഇതിൽ ഒരു ഫോട്ടോ കണ്ടപ്പോൾ അദ്ദേഹമായിരിക്കാമെന്ന് താൻ പറഞ്ഞതായും ബാലചന്ദ്രകുമാർ വ്യക്തമാക്കി.
'' ദിലീപിന്റെ കുടുംബവുമായി വളരെ അടുത്ത ബന്ധമുള്ളയാളാണ് ഈ വി.ഐ.പി. കാവ്യ മാധവൻ അദ്ദേഹത്തെ ''''ഇക്ക'''' എന്നാണ് വിളിച്ചത്. അദ്ദേഹം വന്നിരുന്നിരുന്നപ്പോൾ എല്ലാവർക്കും നല്ല പരിചയം ഉള്ളതായി തന്നെയാണ് തോന്നിയത് ''. അദ്ദേഹത്തിന്റെ പേര് പ്രതിപാദിക്കുന്ന ഒരു ശബ്ദരേഖയുണ്ടെന്നും അത് പരിശോധിച്ചാൽ കൂടുതൽ കാര്യങ്ങൾ വ്യക്തമാകുമെന്നും ബാലചന്ദ്രകുമാർ പറഞ്ഞു.

വി.ഐ.പിയെ തേടി ക്രൈംബ്രാഞ്ച് അന്വേഷണം ആരംഭിച്ചിട്ടുണ്ട്. ബാലചന്ദ്ര കുമാർ ദിലീപിന്റെ വീട്ടിലുണ്ടായിരുന്ന ദിവസം വി.ഐ.പി അവിടെയെത്തിയപ്പോൾ ദിലീപിന്റെ അടുത്ത ബന്ധുവിന്റെ മകൻ ''''ശരത് അങ്കിൾ'''' വന്നുവെന്നു വിളിച്ചുപറഞ്ഞതായാണു ബാലചന്ദ്ര കുമാറിന്റെ മൊഴി. എന്നാൽ ഇത് കേട്ടതിലെ തെറ്റാവാമെന്നും വി.ഐ.പിയുടെ പേര് ഇതല്ലെന്നുമാണ് അന്വേഷണ സംഘത്തിന്റെ നിഗമനം. രാഷ്ട്രീയ സ്വാധീനമുള്ള വി.ഐ.പിയുടെ പേര് ബാലചന്ദ്ര കുമാർ പുറത്തു പറയാൻ മടിക്കുന്നതാണെന്നും വിലയിരുത്തുന്നു. മന്ത്രിയെ ഫോണിൽ വിളിച്ച് അന്ന് എഡി.ജി.പിയായിരുന്ന സന്ധ്യയെ അന്വേഷണത്തിൽനിന്നു മറ്റാൻ സമ്മർദ്ദം ചെലുത്തിയെന്ന ആരോപണവും വി.ഐ.പിക്കെതിരേ ഉയരുന്നുണ്ട്.
ബാലചന്ദ്രകുമാറിന്റെ മൊഴി കഴിഞ്ഞ ദിവസം എടുത്തപ്പോൾ സംശയമുള്ള ചിലരുടെ ചിത്രങ്ങൾ ക്രൈംബ്രാഞ്ച് ബാലചന്ദ്ര കുമാറിനെ കാണിച്ചിരുന്നു.

ഇവരിലേക്കാണ് അന്വേഷണം വ്യാപിച്ചിരിക്കുന്നത്. ആ വി.ഐ.പി ഉടൻ വലയിലാകുമെന്നാണ് ക്രൈംബ്രാഞ്ച് നൽകുന്ന സൂചന.കേസിൽ കൂറുമാറിയ സിനിമാ പ്രവർത്തകരെ വീണ്ടും ചോദ്യംചെയ്യും. കൂറുമാറിയ സാക്ഷികളുടെ സാമ്പത്തിക ഇടപാടുകൾ സംബന്ധിച്ച് പ്രത്യേക സംഘം അന്വേഷിക്കുന്നുണ്ട്. മൂന്നു സാക്ഷികൾ കൂറുമാറാനിടയായ സാഹചര്യം അന്വേഷണ സംഘത്തോട് വെളിപ്പെടുത്തി എന്നും സൂചനയുണ്ട്