തിരുവനന്തപുരം: കേരള ബജറ്റവതരണം തുടങ്ങി. പിണറായി സര്‍ക്കാറിന്റെ അവസാന ബജറ്റാണ് ധനമന്ത്രി തോമസ് ഐസക്ക് ഇന്ന് അവതരിപ്പിക്കുന്നത്. സംസ്ഥാനത്തെ വിവിധ സ്‌കൂളുകളിലെ വിദ്യാര്‍ത്ഥികള്‍ കുറിച്ചിട്ട വരികള്‍ വായിച്ചാണ് ധനമന്ത്രി ബജറ്റവതരണം ആരംഭിച്ചത്. കേരളത്തിന്റെ വിജയഗാഥ ലോകചരിത്രത്തിന്റെ ഭാഗമാവുമെന്ന് ഉറപ്പു നല്‍കുകയാണെന്ന് അദ്ദേഹം ബജറ്റിന്റെ ആമുഖത്തില്‍ പറഞ്ഞു. പ്രതിസന്ധികള്‍ അവസരമാക്കാന്‍ പിണറായി സര്‍ക്കാറിന് സാധിച്ചെന്ന് അദ്ദേഹം വ്യക്തമാക്കി. കൊവിഡ് വ്യാപനം തടയാനായെന്ന് അദ്ദേഹം ചൂണ്ടിക്കാട്ടി.

ക്ഷേമപെന്‍ഷനുകള്‍ 1600 രൂപയാക്കും. ഏപ്രില്‍ ഒന്നു മുതല്‍ വിതരണം ചെയ്യും. പൊതുജനാരോഗ്യം കൂടുതല്‍ മെച്ചപ്പെടുത്തും. നാലായിരം തസ്തികകള്‍ ആരോഗ്യ വകുപ്പില്‍ സൃഷ്ടിക്കും.

പ്രധാന പ്രഖ്യാപനങ്ങള്‍

• 8 ലക്ഷം തൊഴിലവസരങ്ങള്‍ സൃഷ്ടിക്കും. 5 ലക്ഷം അഭ്യസ്തവിദ്യര്‍ക്കും, 3 ലക്ഷം മറ്റുള്ളവര്‍ക്കും
• സാമൂഹ്യക്ഷേമ പെന്‍ഷന്‍ 1600 രൂപയാക്കി; ഏപ്രില്‍ മുതല്‍ പ്രാബല്യത്തില്‍
• ആരോഗ്യവകുപ്പില്‍ 4,000 തസ്തികകള്‍ സൃഷ്ടിക്കും
• 15,000 കോടിയുടെ കിഫ്ബി പദ്ധതികള്‍ പൂര്‍ത്തീകരിക്കും
• നെല്ല് സംഭരണ വില 28 രൂപയാക്കും, റബറിന്റെ തറവില ഉയര്‍ത്തി
• കിഫ്ബി ഉത്തേജന പാക്കേജിന് 60, 000 കോടി
• നാളികേരത്തിന്റെ സംഭരണ വില 132 രൂപയായി ഉയര്‍ത്തി
• കോവിഡാനന്തര കേരളത്തിന് ഉണര്‍വേകുന്ന ബജറ്റെന്ന് മന്ത്രി; നികുതി വര്‍ധന ഉണ്ടാകില്ല
• സ്ത്രീ പ്രൊഫഷണലുകള്‍ക്ക് ഹ്രസ്വപരിശീലനം നല്‍കി ജോലിക്ക് പ്രാപ്തരാക്കും
• വര്‍ക്ക് ഫ്രം ഹോം പദ്ധതിക്ക് ഐകെഎഫ്സി, കെഎസ്എഫ്ഇ, കേരള ബാങ്ക് വായ്പകള്‍ ലഭ്യമാക്കും
• 20 ലക്ഷം പേര്‍ക്ക് അഞ്ച് വര്‍ഷംകൊണ്ട് ഡിജിറ്റല്‍ പ്ലാ്റ്റ്ഫോം വഴി ജോലി നല്‍കുന്ന പദ്ധതിക്ക് തുടക്കം കുറിക്കും
• സന്നദ്ധരായ പ്രൊഫഷണലുകളുടെയും പരിശീലനം സിദ്ധിച്ചവരുടെയും വിവരങ്ങള്‍ ഡിജിറ്റല്‍ പ്ലാറ്റ്ഫോം വഴി ലഭ്യമാക്കും
• കമ്പനികള്‍ക്ക് കേന്ദ്രീകൃതമോ, വികേന്ദ്രീതമോ ആയി ജോലിക്കാരെ തിരഞ്ഞെടുക്കുന്നതിനുളള അവസരം ഒരുക്കും
• എല്ലാ വീട്ടിലും ലാപ്‌ടോപ് ഉറപ്പാക്കും
• കെ ഫോണ്‍ പദ്ധതി ജൂലൈയില്‍ പൂര്‍ത്തീകരിക്കും
• മികച്ച യുവ ശാസ്ത്രജ്ഞന്‍മാരെ ആകര്‍ഷിക്കാന്‍ ഒരു ലക്ഷം രൂപയുടെ ഫെല്ലോഷിപ്പ്
• സര്‍ക്കാര്‍ കൊളജുകളുടെ പശ്ചാത്തല സൗകര്യ വികസനത്തിന് 56 കോടി
• 30 ഓട്ടോണമസ് കേന്ദ്രങ്ങള്‍ സര്‍വകലാശാലകളില്‍ തുടങ്ങും, ഇതിനായി കിഫ്ബി വഴി 500 കോടി നല്‍കും