കൊല്ലം: അധികച്ചെലവ് ഒഴിവാക്കാന്‍ എഴുത്തുപരീക്ഷകള്‍ രണ്ടുഘട്ടമാക്കിയിട്ടും ഒന്നാംഘട്ടംപോലും നടത്താനാകതെ പി.എസ്.സി ത്രിശങ്കുവിലായി. എല്‍.ഡി.സി, എല്‍.ജി.എസ് റാങ്കുലിസ്റ്റുകള്‍ കാലഹരണപ്പെടുന്നതോടെ താല്‍കാലിക നിയമനം ത്വരിതപ്പെടുമോയെന്ന പേടിയിലാണ് ഉദ്യോഗാര്‍ഥികള്‍. സംസ്ഥാനത്ത് മാര്‍ച്ചില്‍ നടക്കുന്ന എസ്.എസ്.എല്‍.സി-പ്ലസ്ടു പരീക്ഷകള്‍, ഏപ്രിലില്‍ നടക്കാന്‍ സാധ്യതയുള്ള നിയമസഭാ ഇലക്ഷന്‍ എന്നിവയെ തുടര്‍ന്ന് പി.എസ്‌സിയുടെ പ്രാഥമിക പത്താംക്ലാസ് ലെവല്‍ പരീക്ഷാ തിയതി പോലും പ്രഖ്യാപിക്കാനാകാതെ നീളുകുയാണ്.

പത്താം ക്ലാസ്, പ്ലസ്ടു, ഡിഗ്രി കോഴ്‌സുകളെ പ്രാഥമിക ലെവലാക്കി തരംതിരിച്ച് പരീക്ഷകള്‍ നടത്താനാണ് പി.എസ്.സി ആറുമാസങ്ങള്‍ മുന്‍പ് തീരുമാനമെടുത്തത്. പുതിയ രീതിയില്‍ പ്രാഥമിക പരീക്ഷയും അതില്‍നിന്നു വിജയിക്കുന്നവരെ തെരഞ്ഞെടുത്ത്, മൂന്ന് വിഭാഗത്തിലും മെയിന്‍ പരീക്ഷകള്‍ നടത്തി റാങ്ക്‌ലിസ്റ്റ് തയാറാക്കാനുള്ള പി.എസ്.സിയുടെ തീരുമാനമാണ് നീളുന്നത്. പി.എസ്.സി യോഗം ഒന്നിലേറെ തവണ ചേര്‍ന്നിട്ടും പത്താംക്ലാസ് ലെവല്‍ പൊതുപരീക്ഷ പോലും പ്രഖ്യാപിക്കാനായിട്ടില്ല. പത്താം ക്ലാസ് പ്രാഥമിക ലെവലില്‍ 149 ഓളം പരീക്ഷകളാണ് നടത്തുന്നത്.
ഭീമമായ ചെലവ് കുറയ്ക്കുകയെന്ന ഉദ്ദേശത്തോടെയാണ് പി.എസ്.സി പരീക്ഷാ രീതികളില്‍ മാറ്റം വരുത്തിയത്. ഓരോന്നും പ്രത്യേകം നടത്തി ഉദ്യോഗാര്‍ഥികളെ കുറച്ചശേഷം രണ്ടാംഘട്ട പരീക്ഷ നടത്താനാണ് തീരുമാനം. 149 ഓളം പരീക്ഷകള്‍ എഴുതാന്‍ 23 ലക്ഷം പേരാണ് ഉണ്ടായിരുന്നത്. പരീക്ഷ എഴുതാന്‍ സ്ഥിരീകരണം(കണ്‍ഫര്‍മേഷന്‍) ചോദിച്ചപ്പോള്‍ അത് 16 ലക്ഷമായി കുറഞ്ഞു.

വേവ്വേറെ പരീക്ഷ നടത്തിയാല്‍ നിരവധി പരീക്ഷകള്‍ക്കായി കോടിക്കണക്കിന് രൂപ പ്രത്യേകം ചെലവാകും.അതൊഴിവാക്കുകയായിരുന്നു പി.എസ്.സി ലക്ഷ്യം. എന്നാല്‍ യഥാസമയം പരീക്ഷ നടത്താനാകാതെ വന്നതോടെ പി.എസ്.സിയുടെ ലക്ഷ്യംതന്നെ പാളുമോയെന്ന ആശങ്കയാണ് ഉദ്യോഗാര്‍ഥികള്‍ക്ക്.