കണ്ണൂർ
സിപി.എം കോട്ടയം ജില്ലാ സമ്മേളന പൊതുയോഗത്തിൽ താൻ ചൈനയെ പുകഴ്ത്തിയതല്ല സത്യം പറയുക മാത്രമായിരുന്നെന്ന് പാർട്ടി പൊളിറ്റ് ബ്യൂറോ അംഗം എസ്. രാമചന്ദ്രൻ പിള്ള. ചൈനീസ് പരാമർശത്തിൽ മുഖ്യമന്ത്രിയുമായി ഒരു അഭിപ്രായവ്യത്യാസവുമില്ലെന്നും എസ്.ആർ.പി വാർത്താസമ്മേളനത്തിൽ വ്യക്തമാക്കി.

ചൈനയെക്കുറിച്ച് എതിരഭിപ്രായം കൂടി പാർട്ടിക്കുണ്ടെന്നാണ് മുഖ്യമന്ത്രി പറഞ്ഞത്. തങ്ങൾ പറഞ്ഞത് ഒരേ അഭിപ്രായമാണ്. ഇക്കാര്യത്തിൽ അഭിപ്രായഭിന്നതയുണ്ടെന്ന വാർത്തകൾ അടിസ്ഥാനരഹിതമാണ്. ലോകത്ത് അമേരിക്കയെ എതിർക്കാൻ ശക്തിയുള്ള രാജ്യമായി ചൈന മാറിയിരിക്കുകയാണ്. കൊവിഡ് പടർന്നുപിടിച്ചപ്പോൾ 142 രാജ്യങ്ങൾക്ക് വാക്‌സിൻ നൽകിയ രാജ്യമാണ് ചൈന.

1979ൽ വലിയ കടബാധ്യതയായിരുന്നു ചൈനയ്ക്ക്. 2019ൽ വികസിത രാജ്യങ്ങൾക്കു പോലും കടം നൽകുന്ന രാജ്യമായി ചൈന മാറി. ഇന്ത്യ- ചൈന അതിർത്തി പ്രശ്‌നം സംഘർഷത്തിലൂടെ പരിഹരിക്കാനാവില്ല. യുദ്ധം ഇരുരാജ്യങ്ങൾക്കും കനത്ത നഷ്ടമേ വരുത്തൂ. അമേരിക്ക ഇതിൽ സന്തോഷിക്കും.

പശ്ചിമ ബംഗാളിൽ പാർട്ടിക്ക് സംഘടനാപരമായും ഭരണപരമായും വീഴ്ച സംഭവിച്ചിട്ടുണ്ട്. കോൺഗ്രസുമായി ഒരു നീക്കുപോക്കും ഇനി ബംഗാളിലുണ്ടാവില്ല. അവിടെ പാർട്ടി ശക്തിപ്രാപിച്ചു വരികയാണെന്നും അദ്ദേഹം പറഞ്ഞു.