ചവറ: ബേബിജോണ്‍ മെമ്മോറിയര്‍ ഗവണ്‍മെന്റ് കോളജിന്റെ ചുറ്റുമതിലിന്റെ ഒരുഭാഗം കോടതി ഉത്തരവ് ഉണ്ടെന്നുപറഞ്ഞ് സമീപവാസി ബുധനാഴ്ച പൊളിച്ചുമാറ്റിയത് വ്യാഴാഴ്ച വിദ്യാര്‍ഥികള്‍ പഠിപ്പ് മുടക്കി പ്രതിഷേധ പ്രകടനം നടത്തിയ ശേഷം കെട്ടിയടച്ചു.

എം.പി.മാരുടെ വികസന ഫണ്ട് ഉപയോഗിച്ച് ചവറ ഗവണ്‍മെന്റ് കോളജിന് ചുറ്റുമതില്‍ നിര്‍മ്മിച്ചത് 2002 ഏപ്രിലിലായിരുന്നു. കോളജിനു പിറകുവശം താമസിക്കുന്ന സ്വകാര്യവ്യക്തി കോമ്പൗണ്ടിന്റെ നടുവിലൂടെ വഴി വേണമെന്ന് ആവശ്യപ്പെട്ട് 2000 മുതല്‍ വിവിധ കോടതികളില്‍ കേസുകള്‍ നടത്തിയിരുന്നു. 2015 സെപ്തംബര്‍ 26 ന് കൊല്ലം അഡീഷണല്‍ ജില്ലാ കോടതിയില്‍ നിന്നും ഹര്‍ജ്ജിക്കാരിക്കനുകൂലമായ വിധിയുണ്ടാകുകയും അത് നടപ്പാക്കാന്‍ കഴിഞ്ഞ 12 ന് കരുനാഗപ്പള്ളി മുന്‍സിഫ് ഉത്തരവിടുകയും ചെയ്തിരുന്നു.

ഇതിന്റെ പശ്ചാത്തലത്തില്‍ ബുധനാഴ്ച വൈകിട്ട് 6 ന് ആമിയന്റെ സാന്നിധ്യത്തില്‍ മതില്‍ പൊളിച്ചുമാറ്റുകയായിരുന്നു. കോളേജ് സമയം കഴിഞ്ഞതിനാല്‍ വിദ്യാര്‍ത്ഥികളോ കോളജ് അധികൃതരോ സ്ഥലത്തുണ്ടായിരുന്നില്ല. എന്നാല്‍ വിവരം അറിഞ്ഞെത്തിയ ഡി.വൈ.എഫ്.ഐ പ്രവര്‍ത്തകര്‍ മതില്‍ പൊളിക്കുന്നത് തടയുകയും കൊടികുത്തുകയും ചെയ്തിരുന്നു.

കൊല്ലം കോടതിയിലെ വിധി നടപ്പാക്കിയെടുക്കാനുള്ള കേസ് കരുനാഗപ്പള്ളി മുനിസിഫ് കോടതിയില്‍ പരിഗണിച്ചപ്പോള്‍ കോളജിനുവേണ്ടി വാദിക്കേണ്ടിയിരുന്ന പബ്ലിക്ക് പ്രോസിക്യൂട്ടര്‍ തടസ്സം ഉന്നയിക്കാഞ്ഞതിനാലായിരുന്നു മതിലുപൊളിച്ചുമാറ്റാന്‍ അനുമതി ലഭിച്ചതെന്നും എന്നാല്‍ വിധി പകര്‍പ്പോ മറ്ററിയിപ്പോ ഒന്നുംതന്നെ കോളജ് അധികൃതര്‍ക്ക് ലഭിച്ചിരുന്നില്ലെന്നും പ്രിന്‍സിപ്പല്‍ ഡോ. എം.ലൈല പറഞ്ഞു.

അതേസമയം കൊല്ലം അഡീഷണല്‍ ജില്ലാ മജിസ്‌ട്രേറ്റിന്റെ 2015 സെപ്തബര്‍ 26 ലെ ഉത്തരവ് രണ്ടാഴ്ചത്തേയ്ക്ക് ഹൈക്കോടതി ഇന്നലെ സ്റ്റേചെയ്തതായി പ്രിന്‍സിപ്പിലും, പി.ടി.എ. വൈസ്പ്രസിഡന്റ് വി. ജ്യോതിഷ്‌കുമാറും അറിയിച്ചു. ജസ്റ്റിസ് എ. ഹരിപ്രസാദാണ് സ്റ്റേ അനുവദിച്ചത്. സമീപവാസികള്‍ക്ക് വഴിനല്‍കി ചുറ്റുമതില്‍ കെട്ടിയടക്കണമെന്ന് ആവശ്യപ്പെട്ട് എസ്.എഫ്.ഐ കോളജ് യൂണിറ്റ് മുമ്പ് ഒരുമാസക്കാലം നിരാഹാര സത്യാഗ്രഹം അനിഷ്ഠിച്ചിരുന്നു. കോമ്പൗണ്ടിന്റെ തെക്കുഭാഗത്തുകൂടി സമീപവാസികള്‍,ക്ക് വഴി നല്‍കണമെന്ന് ആവശ്യപ്പെട്ട് നാല് കേസുകള്‍ കരുനാഗപ്പള്ളി മുന്‍സിഫ് കോടതിയില്‍ നിലവിലുണ്ട്. 1981 ല്‍ ആരംഭിച്ച കോളേജിന് ചുറ്റുമതില്‍ കെട്ടണമെന്നാവശ്യത്തിന് മൂന്നര പതിറ്റാണ്ടിന്റെ പഴക്കമുണ്ട്. 2002 ഏപ്രില്‍ 24 ന് സാമൂഹ്യവിരുദ്ധര്‍ പൊളിച്ച ചുറ്റുമതില്‍ പിറ്റേന്നു കോളേജ് അധികധതര്‍ കെട്ടിയടച്ചിരുന്നു. അതാണ് ബുധനാഴ്ച വീണ്ടും പൊളിച്ചതും പിറ്റേന്ന് കെട്ടിയടച്ചതും. മതില്‍ പൊളിപ്പും കെട്ടിയടക്കലും ഇവിടെ തുടര്‍ക്കഥയാകുകയാണ്.