ന്യൂഡൽഹി
രാജ്യത്തെ വിദ്വേഷ പ്രസംഗങ്ങളോട് ഭരണകക്ഷി നിശബ്ദത പാലിക്കുന്നുവെന്ന് മാത്രമല്ല അതിനെ അംഗീകരിക്കുന്ന നിലപാട് സ്വീകരിക്കുകയും ചെയ്യുന്നുവെന്ന് സുപ്രിംകോടതി മുൻ ജഡ്ജി രോഹിങ്ടൺ നരിമാൻ. മുംബൈയിലെ ഡി.എം ഹരിഷ് സ്‌കൂൾ ഓഫ് ലോ സംഘടിപ്പിച്ച വെബിനാറിൽ സംസാരിക്കുകയായിരുന്നു ജസ്റ്റിസ് നരിമാൻ. ഒരു വിഭാഗത്തെ വംശഹത്യനടത്താൻ ആഹ്വാനമുണ്ടായിട്ടും അതിനെതിരേ നടപടിയെടുക്കാൻ സർക്കാർ വിമുഖത കാട്ടുന്നത് നമുക്ക് കാണാനാവും. സർക്കാരിനെ വിമർശിച്ചതിന് യുവാക്കൾ, സ്റ്റാൻഡ്-അപ്പ് കോമേഡിയൻമാർ, വിദ്യാർഥികൾ എന്നിവർക്കെതിരേ രാജ്യദ്രോഹ നിയമപ്രകാരം കേസെടുക്കുകയും ചെയ്യുന്നുണ്ടെന്നത് നിർഭാഗ്യകരമാണ്.

രാജ്യദ്രോഹ നിയമം കൊളോണിയൽ സൃഷ്ടിയാണെന്നും നമ്മുടെ ഭരണഘടനക്ക് കീഴിൽ അതിന് പ്രസക്തിയില്ലെന്നും നരിമാൻ പറഞ്ഞു. വിദ്വേഷ പ്രസംഗം ഭരണഘടനാ വിരുദ്ധമാണെന്ന് അടുത്തിടെ ഉപരാഷ്ട്രപതി ഒരു പ്രസംഗത്തിൽ പറഞ്ഞുവെന്നത് ആശ്വാസകരമാണ്. അക്രമത്തിനായുള്ള ആഹ്വാനങ്ങളെ അംഗീകരിക്കുന്നതാണ് ഭരണകക്ഷിയുടെ നിലപാട്. ഭരണഘടനയുടെ 19ാം വകുപ്പ് പ്രകാരമുള്ള അഭിപ്രായ സ്വാതന്ത്ര്യം പരമപ്രധാനമാണ്. ഇതിൽ ജനാധിപത്യവും ഏകാധിപത്യവും തമ്മിലുള്ള വ്യത്യാസം അടങ്ങിയിരിക്കുന്നു.

ഔറംഗസീബിനേയും ശിവജിയേയും താരതമ്യപ്പെടുത്തുന്നതിനെയും നരിമാൻ വിമർശിച്ചു. സാഹോദര്യം ഭരണഘടനയുടെ പ്രധാന മൂല്യമാണ്. നിങ്ങൾ സാഹോദര്യത്തോടെ ഇടപഴകാൻ ആഗ്രഹിക്കുന്നുവെങ്കിൽ ബാബറിനെയോ അക്ബറിനെയോ പോലുള്ള മുഗൾ ചക്രവർത്തിമാരെ താരതമ്യത്തിനായി തെരഞ്ഞെടുക്കണം.

അക്ബർ ഏറ്റവും വലിയ മതേതര ഭരണാധികാരികളിൽ ഒരാളായിരുന്നുവെന്നും നരിമാൻ വ്യക്തമാക്കി. മത വിശ്വാസം വ്രണപ്പെടുത്താതിരിക്കാൻ, പശുക്കളെ ബലിനൽകുന്നതിൽ നിന്ന് വിട്ടുനിൽക്കണമെന്നാവശ്യപ്പെട്ട് ബാബർ മകൻ ഹുമയൂണിന് എഴുതിയ കത്തും നരിമാൻ പ്രസംഗത്തിനിടെ ഉദ്ദരിച്ചു.