കഴിഞ്ഞ ദിവസത്തെ വിദ്യാപ്രഭാതത്തില്‍ മരുഭൂമിയെ കുറിച്ചുള്ള ലേഖനം കൂട്ടുകാര്‍ വായിച്ചല്ലോ. കുറച്ചു കാര്യങ്ങള്‍ കൂടി മരുഭൂമിയെകുറിച്ച് കൂട്ടുകാര്‍ക്ക് ശേഖരിക്കാം.

=ഭൂമിയുടെ 71 ശതമാനവും ജലഭാഗമാണ്. ബാക്കി വരുന്ന 29 ശതമാനമാണ് കരപ്രദേശം. എന്നാല്‍ ചില കണക്കനുസരിച്ച് 70 ശതമാനം ജലവും 30 ശതമാനം കരഭാഗവുമാണ്. എന്തായാലും ഈ കരഭാഗത്തിന്റെ  33 ശതമാനം മരുഭൂമിയാണെന്നാണ് പല പഠനങ്ങളും സൂചിപ്പിക്കുന്നത്. അങ്ങനെ വരുമ്പോള്‍ ഭൂമിയുടെ കര ഭാഗത്തിന്റെ മൂന്നിലൊരു ഭാഗം മരുഭൂമിയാണ്. മൂന്നില്‍ രണ്ട് ഭാഗമാണ് മറ്റുള്ള പ്രദേശങ്ങള്‍.

=മരുഭൂമികള്‍ കാഴ്ചയില്‍ വാസയോഗ്യമല്ലെന്ന് തോന്നുമെങ്കിലും ലോകത്തുള്ള പല മരുഭൂമിയും ലക്ഷക്കണക്കിന് മനുഷ്യരുടെ വാസസ്ഥലമാണ്.

=ഇന്നും ലോക ജനസംഖ്യയുടെ പത്തിലൊരു ഭാഗം വസിക്കുന്നത് മരുഭൂമിയിലാണ്. മനുഷ്യനെ കൂടാതെ അനേകം ജീവജാലങ്ങളുടെ വാസ സ്ഥലം കൂടിയാണ് മരുഭൂമി.

=ലോകത്തിലെ ഏറ്റവും വലിയ മരുഭുമി എന്ന പദവി അന്റാര്‍ട്ടിക്കയ്ക്കാണ്. ആദ്യ കാലത്ത് ഈ സ്ഥാനം സഹാറയ്ക്ക് ആയിരുന്നു. അന്റാര്‍ട്ടിക്കയെ മരുഭൂമിയുടെ ഗണത്തില്‍ ഉള്‍പ്പെടുത്തിയപ്പോള്‍ ഈ സ്ഥാനം സഹാറയ്ക്ക് നഷ്ടമായി. മണലും മണല്‍ക്കുന്നുകളും നിറഞ്ഞ  ലോകത്തിലെ ഏറ്റവും വലിയ മരുഭൂമി  അല്‍റുബ് അല്‍ ഖാലി (എംപ്റ്റി ക്വാര്‍ട്ടര്‍)  എന്ന അറേബ്യന്‍ മരുഭൂമിയാണ്.

=വര്‍ഷത്തില്‍ 10 ഇഞ്ചില്‍ താഴെ മഴ ലഭിക്കുന്ന പ്രദേശത്തെ മരുഭൂമിയായി കണക്കാക്കുന്ന രീതിയാണ് ഭൗമ ശാസ്ത്രജ്ഞര്‍ സ്വീകരിച്ചിട്ടുള്ളത്.
=ഭൂമിയിലെ എല്ലാ ഭൂഖണ്ഡങ്ങളിലും മരുഭൂമിയുണ്ട്. ഓരോ ഭൂഖണ്ഡത്തിന്റേയും നല്ലൊരു ഭാഗം വിസ്തൃതി മരുഭൂമി കൈയടക്കുന്നുണ്ട്.അതിലേറെ അത്ഭുതപ്പെടേണ്ട വസ്തുത ഓരോ ദിവസവും മരുഭൂമികളുടെ വിസ്തൃതി രണ്ട് അടി കൂടി വരുന്നുണ്ടെന്നാണ്.