മുംബൈ
ക്ലബ് ഹൗസിൽ മുസ് ലിം സ്ത്രീകൾക്കെതിരേ അശ്ലീല പരാമർശത്തോടെ ചർച്ച നടത്തിയ കേസിൽ മൂന്നു യുവാക്കൾ അറസ്റ്റിൽ. ആകാശ് (19), ജെയ്ഷവ് (21), യാഷ് പരാശ്വർ (22) എന്നിവരെ ഹരിയാനയിൽ നിന്നാണ് അറസ്റ്റ് ചെയ്തത്. ഒരു സ്ത്രീ നൽകിയ പരാതിയിൽ മുംബൈ സൈബർ സെൽ കേസ് രജിസ്റ്റർ ചെയ്തിരുന്നു. ക്ലബ് ഹൗസിലെ ചർച്ചയുടെ ക്ലിപ് സമൂഹ മാധ്യമങ്ങളിലും വൈറലായിരുന്നു. സമാന രീതിയിലുള്ള വിദ്വേഷ പ്രചാരണവും അന്വേഷിക്കുന്നുണ്ടെന്ന് പൊലിസ് പറഞ്ഞു. അറസ്റ്റിലായ യാഷ് പരാശ്വർ നിയമ വിദ്യാർഥിയാണ്. ഇയാളായിരുന്നു മോഡറേറ്റർ. ജെയ്ഷവും ആകാശും ക്ലബ് ഹൗസിൽ മുസ് ലിം സ്ത്രീകൾക്കെതിരേ മറ്റു ചർച്ചകളും നടത്തിയിരുന്നു. പ്രതികളെ റിമാൻഡ് ചെയ്തു. സമാന പരാതിയിൽ കേസെടുത്ത ഡൽഹി പൊലിസ്, ക്ലബ് ഹൗസിലെ വിദ്വേഷ ചാറ്റ് ഗ്രൂപ്പുകളുടെ അഡ്മിൻമാരെ കുറിച്ച് ക്ലബ് ഹൗസ് പ്രതിനിധികളോട് വിശദീകരണം തേടി. ഡൽഹി വനിതാ കമ്മിഷൻ്റെ നോട്ടിസിനു പിന്നാലെയാണിത്.