കൊച്ചി: സംസ്ഥാന ഹജ്ജ് കമ്മിറ്റി മുഖേന 22 മുതല്‍ 31 വരെ നെടുമ്പാശ്ശേരി വിമാനത്താവളത്തില്‍ നിന്ന് ഹജ്ജിന് പുറപ്പെടുന്ന തീര്‍ഥാടകരുടെ വിവരങ്ങള്‍ ഹജ്ജ് കമ്മിറ്റിയുടെ വെബ്‌സൈറ്റില്‍ പ്രസിദ്ധീകരിച്ചു.
www.hajcommittee.gov.in എന്ന വെബ്‌സൈറ്റില്‍ നിന്നാണ് വിവരങ്ങള്‍ ലഭ്യമാകുന്നത്. തീര്‍ഥാടകര്‍ പുറപ്പെടുന്നതിന്റെ തലേന്ന് ഉച്ചയ്ക്ക് ശേഷം രണ്ട് മുതല്‍ അഞ്ച് വരെയുള്ള സമയത്ത് ഹജ്ജ്ക്യാംപില്‍ റിപ്പോര്‍ട്ട് ചെയ്യണം.
ഓരോ വിമാനത്തിലും തീര്‍ഥാടകരെ അനുഗമിക്കാന്‍ നിയോഗിക്കപ്പെട്ട ബന്ധപ്പെട്ട ഹാജിമാരെ ടെലിഫോണ്‍ മുഖേന വിവരങ്ങള്‍ അറിയിക്കുകയും ചെയ്യുമെന്ന് സംസ്ഥാന ഹജ്ജ് കമ്മിറ്റി അസിസ്റ്റന്റ് സെക്രട്ടറി അറിയിച്ചു. ആലുവ റെയില്‍വേ സ്റ്റേഷനില്‍ എത്തുന്നവരെ ഹജ്ജ് ക്യാംപില്‍ എത്തിക്കുന്നതിനുള്ള ക്രമീകരണങ്ങള്‍ ചെയ്യുന്നുണ്ട്. നിശ്ചിതസമയത്ത് മാത്രമായിരിക്കും കൗണ്ടറുകള്‍ പ്രവര്‍ത്തിക്കുക എന്നതിനാല്‍ എല്ലാവരും സമയനിഷ്ഠ പാലിച്ച് സഹകരിക്കണമെന്ന് ഹജ് കമ്മിറ്റി അറിയിച്ചു.
നെടുമ്പാശ്ശേരിയിലെ ഹജ്ജ് ക്യാംപില്‍ ഓഫിസുകള്‍ തുറന്ന് പ്രവര്‍ത്തനം ആരംഭിച്ചതോടെ ഒരുക്കങ്ങള്‍ അന്തിമഘട്ടത്തിലായി.