പേരൂര്‍ക്കട: നെട്ടയത്ത് വിവിധ ഹോട്ടലുകളില്‍ നഗരസഭാ ആരോഗ്യവിഭാഗത്തിന്റെ നേതൃത്വത്തില്‍ പരിശോധന നടത്തി.
ജങ്ഷനിലെ ഒരു റസ്റ്ററന്റ്, ചപ്പാത്തി കോര്‍ണര്‍ എന്നീ സ്ഥാപനങ്ങളിലായിരുന്നു പരിശോധന. ഇന്നലെ രാവിലെ എട്ടിനാണ്  ഹെല്‍ത്ത് ഇന്‍സ്‌പെക്ടര്‍ ജോസഫ് സിംഗിന്റെ നേതൃത്വത്തിലുള്ള സംഘം കടകളില്‍ പരിശോധനയ്ക്ക് നടത്തിയത്.
നെട്ടയത്തെ വിവിധ ഹോട്ടലുകളില്‍ നല്‍കുന്ന ആഹാരസാധനങ്ങള്‍ പഴകിയതാണെന്ന വ്യാപകമായ പരാതികളുടെ അടിസ്ഥാനത്തിലായിരുന്നു പരിശോധന. ഹോട്ടലുകളില്‍നിന്ന് പഴകിയ ബീഫ്‌ഫ്രൈ, പൊറോട്ട, കേടായ കടല, ചപ്പാത്തി എന്നിവ പരിശോധനയില്‍ കണ്ടെത്തി. കടകള്‍ പൂട്ടാന്‍ ഹെല്‍ത്ത് വിഭാഗം തീരുമാനിച്ചുവെങ്കിലും ഒരുതവണകൂടി അവസരം നല്‍കണമെന്ന് ആവശ്യപ്പെട്ടതിന്റെ അടിസ്ഥാനത്തില്‍ ഹോട്ടലുടമകള്‍ക്കു നോട്ടിസ് നല്‍കുകയായിരുന്നു.
ഹോട്ടലുകളില്‍ ഒരെണ്ണം നേരത്തെ മാലിന്യപ്രശ്‌നത്തിന്റെ അടിസ്ഥാനത്തില്‍ അടച്ചുപൂട്ടിയിരുന്നു. പരിശോധന നടന്ന ഹോട്ടലുകളില്‍നിന്ന് ആഹാരത്തിന്റെ സാമ്പിളുകള്‍ പരിശോധനയ്ക്ക് എടുത്തിട്ടുണ്ട്. ഒരു ഹോട്ടലില്‍ നിന്ന്
തെര്‍മോകോള്‍ പ്ലേറ്റുകള്‍ പിടിച്ചെടുത്തിട്ടുണ്ട്. ആഹാരസാധനങ്ങള്‍ നിരോധിത പ്ലേറ്റുകളില്‍ ഉപയോഗിച്ചതായി കണ്ടെത്തിയിരുന്നു.
ഇതിനിടെ സോണല്‍ ഓഫിസിനു സമീപം അനധികൃത പച്ചക്കറി വ്യാപാര തട്ടുകള്‍ നടത്തിയിരുന്നത് അധികൃതര്‍ ഒഴിപ്പിക്കാന്‍ ശ്രമിച്ചത് ചെറിയ പ്രശ്‌നങ്ങള്‍ക്കു കാരണമായി. ഓഫിസിനുസമീപം മൂന്നു വ്യാപാരികള്‍ അനധികൃതമായി പച്ചക്കറി വ്യാപാരം നടത്തിവന്നിരുന്നു. ഇത് ഒഴിപ്പിക്കണമെന്നാവശ്യപ്പെട്ട് വിവിധ കൗണ്‍സിലര്‍മാര്‍ അധികാരികളെ സമീപിച്ചിരുന്നു.
കച്ചവടം ഒഴിപ്പിക്കുന്നതിനെതിരേ കാച്ചാണി നെല്ലിവിള സ്വദേശി പ്രശാന്ത് ആത്മഹത്യാ ഭീഷണി മുഴക്കി. ഇതോടെ ഹെല്‍ത്ത് അധികാരികള്‍ തല്‍ക്കാലത്തേക്കു പിന്‍വാങ്ങുകയായിരുന്നു. വരുന്ന ഓണംവരെ കച്ചവടം നടത്താമെന്നും അതിനുശേഷം കച്ചവടം ഒഴിവാക്കണമെന്നുമാണ് അധികൃതര്‍ ആവശ്യപ്പെട്ടിരിക്കുന്നത്.