തിരുവനന്തപുരം: വിവാദങ്ങൾക്കിടെ സർവകലാശാല ചാൻസലറെന്ന നിലയിൽ പ്രവർത്തിച്ചു തുടങ്ങി ഗവർണർ ആരിഫ് മുഹമ്മദ് ഖാൻ. സർവകലാശാലകളുമായി ബന്ധപ്പെട്ട ഫയലുകൾ അദ്ദേഹം നോക്കിത്തുടങ്ങി. മുഖ്യമന്ത്രിയുടെ നാല് കത്തുകളും രണ്ട് തവണ ഫോൺ വിളിച്ചതുമാണ് തർക്ക പരിഹാരത്തിനു കാരണം. ഫയൽ നോക്കുമ്പോഴും കണ്ണൂർ വി.സി നിയമന കേസിൽ ഗവർണർ കോടതിയിൽ സ്വീകരിക്കുന്ന നിലപാട് നിർണായകമാണ്.

കത്ത് അയച്ചതിനു പുറമേ രണ്ടു തവണ ഗവര്‍ണറുമായി ഫോണില്‍ സംസാരിച്ചു കാര്യങ്ങള്‍ വിശദീകരിച്ച ശേഷമാണു മുഖ്യമന്ത്രി യുഎസിലേക്ക് പോയത്. ആദ്യ മൂന്നു കത്തു ലഭിച്ചപ്പോള്‍തന്നെ മുഖ്യമന്ത്രിയുടെ നിലപാടില്‍ തൃപ്തനാണെന്നു ഗവര്‍ണര്‍ അറിയിച്ചിരുന്നു. തുടര്‍ന്നാണ് നാലാമത്തെ കത്ത് മുഖ്യമന്ത്രിയുടെ ഓഫിസിലെ പ്രമുഖന്റെ കൈവശം കൊടുത്തയയ്ക്കുകയും മുഖ്യമന്ത്രി സംസാരിക്കുകയും ചെയ്തത്.

ചാന്‍സലര്‍ പദവി താന്‍ ഒഴിയുകയാണെന്നും അത് മുഖ്യമന്ത്രി ഏറ്റെടുത്തു കൊള്ളാനും ആവശ്യപ്പെട്ടു കഴിഞ്ഞ മാസം എട്ടാം തീയതിയാണ് മുഖ്യമന്ത്രിക്കു ഗവര്‍ണര്‍ കത്തയച്ചത്.