പള്ളിക്കല്‍: കോഴിക്കോട് ബൈപാസ് റോഡില്‍ വച്ച് ടൂറിസ്റ്റ് ബസിന് സൈഡ് കൊടുത്തില്ലെന്നാരോപിച്ച് ലോറി ഡ്രൈവറെ ബസ് യാത്രക്കാര്‍ മര്‍ദ്ദിച്ചതായി പരാതി.
എല്‍.പി.ജി സിലിണ്ടറുമായി ചേളാരിയിലെ ഐ.ഒ.സിയിലേക്ക് പോകുന്ന ലോറി ഡ്രൈവര്‍ക്കാണ് മര്‍ദ്ദനമേറ്റത്. ലോറി ഡ്രൈവറെ തിരൂരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചു. കണ്ണൂരില്‍ നിന്നു തൃശൂരിലേക്ക് പോകുന്ന ടൂറിസ്റ്റ് ബസിലെ ഡ്രൈവറും യാത്രക്കാരും ചേര്‍ന്നാണ് ഡ്രൈവറെ മര്‍ദ്ദിച്ചത്. ഡ്രൈവര്‍ വിവരമറിയിച്ചതനുസരിച്ച് ചേളാരി ഐ.ഒ.സിക്ക് മുന്‍പില്‍ വച്ച് ലോറി ഡ്രൈവര്‍മാര്‍ ബസ് തടഞ്ഞ് ചോദ്യം ചെയ്തത് സംഘര്‍ഷത്തിനിടയാക്കി. ബസ് തടഞ്ഞു നിര്‍ത്തി ബസിലെ സ്ത്രീകളടക്കമുള്ള യാത്രക്കാരെ മര്‍ദ്ദിച്ചതായി ബസിലെ യാത്രക്കാര്‍ ആരോപണമുന്നയിച്ചു. ഇതുമായി ബന്ധപ്പെട്ട് ലോറി ഡ്രൈവേഴ്‌സ് യൂനിയന്‍ ഭാരവാഹികളും ബസ് യാത്രക്കാരും തേഞ്ഞിപ്പലം പൊലിസില്‍ പരാതി നല്‍കാന്‍ എത്തിയെങ്കിലും ഇരു വിഭാഗവും പ്രശ്‌നം ഒത്തു തീര്‍പ്പാക്കുകയായിരുന്നു.