തിരുവനന്തപുരം: വിതുരയ്ക്ക് സമീപം കല്ലാറില്‍ കാട്ടാനയെ ചെരിഞ്ഞ നിലയില്‍ കണ്ടെത്തി. കാട്ടാറിന് അടുത്ത് 26ാം മൈലില്‍ സ്വകാര്യ വ്യക്തിയുടെ സ്ഥലത്തോട് ചേര്‍ന്നാണ് ആനയെ ചെരിഞ്ഞ നിലയില്‍ കണ്ടെത്തിയത്.

പത്തുവയസോളം പ്രായം തോന്നിക്കുന്ന പിടിയാനയാണ് ചെരിഞ്ഞത്. കുട്ടിയാന ജഡത്തിനൊപ്പം മണിക്കൂറുകളായി തുടരുകയാണ്. വനംവകുപ്പ് ഉദ്യോഗസ്ഥരും സ്ഥലത്തെത്തിയെങ്കിലും കുട്ടിയാന അവിടെ തുടരുന്നതിനാല്‍ ജഡം പരിശോധിക്കാന്‍ കഴിഞ്ഞിട്ടില്ല. ആനയുടെ മരണകാരണം വ്യക്തമായിട്ടില്ല. പോസ്റ്റ്‌മോര്‍ട്ടത്തിന് ശേഷമേ കൃത്യമായ വിവരം ലഭ്യമാകൂ.

ആറ് മാസം മാത്രമേ കുട്ടിയാനയ്ക്ക് പ്രായം തോന്നിക്കുന്നുള്ളൂ. കോട്ടൂരിലെ ആന പരിപാലന കേന്ദ്രത്തിലേക്ക് കുട്ടിയാനയെ മാറ്റാനുള്ള ശ്രമം നടക്കുന്നുണ്ട്.