തിരുവനന്തപുരം: സോളാര്‍ കേസ് സി.ബി.ഐയ്ക്ക് വിട്ടത് ബി.ജെ.പിയുമായുള്ള രഹസ്യ ധാരണയെ തുടര്‍ന്നാണെന്ന ആരോപണവുമായി പ്രതിപക്ഷ നേതാവ് രമേശ് ചെന്നിത്തല. ഓലപ്പാമ്പ് കാട്ടി പേടിപ്പിക്കാമെന്ന് കരുതണ്ട. ഏത് അന്വേഷണത്തെയും യു.ഡി.എഫ് ഒറ്റക്കെട്ടായി നേരിട്ടും. ജനങ്ങള്‍ വിഡ്ഡികളാണെന്ന് എല്‍.ഡി.എഫ് കരുതരുതെന്നും ചെന്നിത്തല പറഞ്ഞു.

ഇരകള്‍ നേരിട്ട് ആവശ്യപ്പെട്ട കേസുകളില്‍ പോലും സി.ബി.ഐ അന്വേഷണത്തെ എതിര്‍ത്ത പിണറായിക്ക് ഇപ്പോള്‍ സി.ബി.ഐയോട് പ്രേമം എവിടെ നിന്ന് വന്നുവെന്നും ചെന്നിത്തല ചോദിച്ചു.

പെരിയകേസില്‍ സി.ബി.ഐ അന്വേഷണം വേണ്ടെന്ന് ആവശ്യപ്പെട്ട് സുപ്രിംകോടതി വരെ പോയവരാണ് ഇപ്പോള്‍ തെളിവൊന്നും ഇല്ലാത്ത കേസ് സി.ബി.ഐയ്ക്ക് വിടുന്നത്. നീക്കത്തെ രാഷ്ട്രീയമായി നേരിടുമെന്നും അദ്ദേഹം കൂട്ടിച്ചേര്‍ത്തു.