മഞ്ചേരി: പ്രപഞ്ചത്തിലെ ജീവജാലങ്ങളിൽ ഇൻഫ്രാറെഡ് രശ്മികളാലുള്ള കോശേതര ജീവിവർഗത്തിന്റെ സാന്നിധ്യം കണ്ടെത്തി യുവ ഗവേഷകൻ. നിലമ്പൂർ സ്വദേശി ചെമ്മല സ്വാദിഖ് വാഫിയാണ് പ്രകാശശാസ്ത്ര, ജീവശാസ്ത്ര പഠന മേഖലകളിലെ നിർണായ കണ്ടെത്തലിനു പിന്നിൽ.

ഇൻഫ്രാ ബീയിങ്സ് എന്നാണ് പുതിയ ജീവിവർഗത്തിന്റെ പേര്. മൂന്ന് വർഷത്തെ ശാസ്ത്രീയ നിരീക്ഷണങ്ങൾക്കൊടുവിലാണ് പുതിയ ജീവിവർഗത്തിന്റെ സാന്നിധ്യം കണ്ടെത്തിയത്. ഇദ്ദേഹത്തിന്റെ പഠനം ജേണൽ ഓഫ് ഫിസിക്‌സ് ആൻഡ് ആസ്‌ട്രോണമി പ്രസിദ്ധീകരിച്ചു. 10ാം വാള്യത്തിലാണ് ഗവേഷണ പഠനം പ്രസിദ്ധീകരിച്ചത്. നഗ്നനേത്രങ്ങൾ കൊണ്ട് കാണാൻ കഴിയാത്ത രശ്മികളാലുള്ള പുതിയ ജീവിവർഗത്തിന്റെ സാന്നിധ്യം ഇൻഫ്രാറെഡ് നൈറ്റ് വിഷൻ സാങ്കേതിക വിദ്യയുള്ള കാമറയുടെ സഹായത്താൽ നിലമ്പൂരിലെ വിവിധ പ്രദേശങ്ങളിൽ നടത്തിയ ശാസ്ത്രീയ പരിശോധനകളിലൂടെയാണ് കണ്ടെത്താനായത്. വ്യത്യസ്ത ദിശയിലേക്ക് സഞ്ചരിക്കാനും സ്വയം വേഗത നിയന്ത്രിക്കാനുമുള്ള ഇൻഫ്രാ ബീയിങ്സിന്റെ കഴിവ് പ്രകാശത്തിൽനിന്ന് ഇവയെ വ്യത്യസ്തരാക്കുന്നു.

ഇവയ്ക്ക് പ്രകാശത്തേക്കാൾ വേഗതയിൽ സഞ്ചരിക്കാൻ സാധിക്കുമെന്ന് സ്വാദിഖ് വാഫി പറയുന്നു. വലിയ തോതിൽ ഇലക്ട്രോ-മാഗ്‌നൈറ്റിക്  റേഡിയേഷൻ പുറംതള്ളുന്ന നക്ഷത്രങ്ങളിൽനിന്നോ മറ്റോ ആയിരക്കണക്കിന് വർഷങ്ങൾക്കുമുമ്പ് രൂപപ്പെട്ടതായിരിക്കാം ഇൻഫ്രാ ബീയിങ്സ് എന്നും ഗവേഷകൻ പറയുന്നു. 

കാവനൂർ മജ്മഅ് ശരീഅത്ത് ആൻഡ് ആർട്‌സ് കോളജിൽനിന്ന് ഇസ്‌ലാമിക് ശരീഅയിൽ ബിരുദാനന്തര ബിരുദവും കാലിക്കറ്റ് സർവകലാശാലയിൽനിന്ന് ഇംഗ്ലിഷ് സാഹിത്യത്തിൽ ബിരുദവും കരസ്ഥമാക്കിയിട്ടുണ്ട്. നിലമ്പൂർ തൊണ്ടിയിൽ ചെമ്മല മുഹമ്മദിന്റെയും ഹവ്വാ ഉമ്മയുടെയും മകനാണ് സ്വാദിഖ് വാഫി.