മലപ്പുറം: കോണ്‍ഗ്രസ് നേതാക്കളായ ഉമ്മന്‍ചാണ്ടി രമേശ് ചെന്നിത്തലയും പാണക്കാടെത്തി ഹൈദരലി ശിഹാബ് തങ്ങളെ കണ്ടു. പി.കെ.കുഞ്ഞാലിക്കുട്ടി, കെ.പി.എ.മജീദ് തുടങ്ങിയ ലീഗിന്റെ മുതിര്‍ന്ന നേതാക്കളും ചര്‍ച്ചയില്‍ പങ്കെടുത്തു.

രാഹുല്‍ ഗാന്ധിയെ സ്വീകരിക്കാന്‍ കരിപ്പൂരിലേക്ക് പോകുംവഴിയാണ് ഇരുവരും പാണക്കാട് എത്തിയത്. ഏകദേശം അരമണിക്കൂറോളം ചര്‍ച്ച നടന്നു. മുസ്ലിം ലീഗ് അധിക സീറ്റ് ചോദിച്ചത് സംബന്ധിച്ച് പ്രാരംഭ ചര്‍ച്ചകള്‍ നടന്നു.

അടുത്ത ദിവസം മറ്റ് ഘടകകക്ഷികളുമായി ചര്‍ച്ച നടത്തും. കേരള കോണ്‍ഗ്രസ് മുന്നണി വിട്ട സാഹചര്യത്തില്‍ കൂടുതല്‍ സീറ്റുകള്‍ ആവശ്യപ്പെടാനുള്ള ഒരുക്കത്തിലാണ് യു.ഡി.എഫിലെ കോണ്‍ഗ്രസിതര ഘടകകക്ഷികള്‍. മുസ്ലിം ലീഗും ആര്‍.എസ്.പിയും കേരള കോണ്‍ഗ്രസ് ജേക്കബ് വിഭാഗവും സി.എം.പിയുമൊക്കെ സീറ്റുകള്‍ കൂടുതല്‍ ആവശ്യപ്പെടാനുളള ഒരുക്കത്തിലാണ്.

കേരള കോണ്‍ഗ്രസ് (എം) മത്സരിച്ചിരുന്ന മധ്യകേരളത്തിലെ പല സീറ്റുകളിലും അവര്‍ക്കു നോട്ടമുണ്ട്. മധ്യകേരളത്തിലെ ചില സീറ്റുകള്‍ കോണ്‍ഗ്രസും നോക്കുന്നുണ്ട്.