ലക്നൗ: ഉത്തർപ്രദേശിലെ മുസ്‌ലിം രാഷ്ട്രീയ പാർട്ടിയായ ഇത്തിഹാദെ മില്ലത്ത് കൗൺസിൽ സ്ഥാപക നേതാവ് തൗഖീർ റസാഖാന്റെ മരുമകൾ ബിജെപിയിൽ ചേർന്നു. നേരത്തെ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി സ്വന്തം സഹോദരിയെപ്പോലെയാണെന്ന് വിശേഷിപ്പിച്ചിരുന്ന നിദ ഖാനാണ് ബിജെപി അംഗത്വമെടുത്തത്.

മുത്വലാഖിനെതിരെ നിയമം കൊണ്ടുവന്ന് ബിജെപി സർക്കാർ സ്ത്രീകൾക്ക് നൽകിയ സുരക്ഷ ഇത്തവണ തെരഞ്ഞെടുപ്പിലെ പ്രധാന ചർച്ചയാകും. വനിതാ ശാക്തീകരണത്തിനു വേണ്ടി പ്രവർത്തിക്കുന്ന പാർട്ടിയാണ് ബിജെപിയെന്നും നിദ അഭിപ്രായപ്പെട്ടു.

  രണ്ട് ആഴ്ച മുൻപ് തന്റെ ഭർതൃപിതാവ് തൗഖീർ റസാ ഖാൻ കോൺഗ്രസിൽ ചേർന്നെങ്കിലും താൻ എപ്പോഴും ബിജെപിയെയാണ് പിന്തുണയ്ക്കുന്നതെന്നും അവർ കൂട്ടിച്ചേർത്തു. ഭർതൃപിതാവിനെതിരായ ആരോപണങ്ങളിലൂടെയാണ് നിദ ഖാൻ നേരത്തെ മാധ്യമങ്ങളിൽ നിറഞ്ഞിരുന്നു. 'മുത്വലാഖിന്റെ ഇര'യായും ആഘോഷിക്കപ്പെട്ടിരുന്നു. ഈ മാസം ആദ്യത്തിലാണ് മൗലാന തൗഖീർ റസാ ഖാൻ കോൺഗ്രസിൽ ചേർന്നത്. 2001ലാണ് തൗഖീർ റസാ ഖാന്റെ നേതൃത്വത്തില്‍ ഇത്തിഹാദെ മില്ലത്ത് കൗൺസിൽ രൂപീകൃതമാകുന്നത്.