കോഴിക്കോട്∙ വെള്ളിമാടുകുന്ന് ചിൽഡ്രൻസ് ഹോമിലെ പെൺകുട്ടികളെ കാണാതായ സംഭവത്തിൽ പിടിയിലായ യുവാക്കൾ തെറ്റൊന്നും ചെയ്തിട്ടില്ലെന്ന് പെണ്‍കുട്ടികള്‍ പറഞ്ഞു. കാണാതായതിനു ശേഷം തിരിച്ചെത്തിയ പെൺകുട്ടികളാണ് മാധ്യമങ്ങൾക്ക് മുന്നിൽ ഇക്കാര്യം പറഞ്ഞത്. ‘ആ പാവങ്ങൾ ഞങ്ങളെ ഒന്നും ചെയ്തില്ല. എന്നിട്ടാണ് അവരെ ഇപ്പോൾ പിടിച്ചിരിക്കുന്നത്’– വികാരാധീനരായി പെൺകുട്ടികൾ മാധ്യമ പ്രവർത്തകരോടു പറഞ്ഞു.

ബാലികാമന്ദിരത്തിലെ കുട്ടികളുടെ താല്‍പര്യം സംരക്ഷിക്കുമെന്ന് സിഡബ്ല്യുസി വ്യക്തമാക്കി. കുട്ടികളെ വിശദമായി കേട്ടു. പരാതികളില്‍ പരിഹാരം കാണുമെന്നും അടിയന്തര യോഗത്തിനുശേഷം സിഡബ്ല്യുസി  ചെയര്‍മാന്‍ പി.എം.തോമസ് പറഞ്ഞു. അതേസമയം, ചില്‍ഡ്രന്‍സ് ഹോമില്‍ നിന്ന് രക്ഷപെട്ട  പെണ്‍കുട്ടികളിലൊരാള്‍ കൈമുറിച്ച സംഭവം ആത്മഹത്യാശ്രമമായി കണക്കാക്കുന്നില്ലെന്ന് പൊലീസ് പറഞ്ഞു.