കരുവാരകുണ്ട്: കര്‍ഷക ദിനാചരണത്തിന്റെ ഭാഗമായി മേലാറ്റൂര്‍ ചെമ്മാണിയോട് പി.ടി.എം.യു.പി സ്‌കൂളില്‍ സംഘടിപ്പിച്ച പരമ്പരാഗതമായ കാര്‍ഷികോപകരണങ്ങളുടെയും, ഗൃഹോപരണങ്ങളുടെയും പ്രദര്‍ശനം 'കേരള തനിമ 2016' ശ്രദ്ധേയമായി. വിദ്യാര്‍ഥികള്‍ക്ക് കാര്‍ഷിക സാംസ്‌കാരത്തെയും ഗ്രാമീണ ജീവിതത്തെയും കുറിച്ച് അറിവു നല്‍കുക എന്ന ഉദ്ദേശ്യത്തോടയാണു പരിപാടി സംഘടിപ്പിച്ചത്.  കാര്‍ഷികോപരണങ്ങളായ മുറം, ഏത്തം, കലപ്പ, നുകം, പറ, നാരായം, തൊപ്പിക്കുട, വീശിക്കുട, പുരാഗത ഗൃഹോപരണങ്ങളായ ഉരുണി, ഉരല്‍, കോളാമ്പി, ഭരണി, മീന്‍കൊട്ട  തുടങ്ങിയവയ്ക്കു പുറമെ പുരാതന നാണയങ്ങളും പ്രദര്‍ശനത്തിലുണ്ടായിരുന്നു.  സ്‌കൂള്‍ പി.ടി.എ പ്രസിഡന്റ് കെ.സി അബു ഉദ്ഘാടനം ചെയ്തു. പ്രധാനാധ്യാപകന്‍ എന്‍ .ഉസ്മാന്‍ അധ്യക്ഷനായി. സി.കെ ഖദീജ, എ. ഫക്കറുദ്ദീന്‍, ടി. പ്രീത, ടി.പി റുഖ്‌സാനത്ത് സംസാരിച്ചു.