തിരുവനന്തപുരം: സംസ്ഥാനത്തെ എല്ലാ ജില്ലാ ആശുപത്രികളിലും പെയിന്‍ ആന്റ് പാലിയേറ്റീവ് സെന്ററുകള്‍ വരുന്നു. സന്നദ്ധ സംഘടനകള്‍ക്ക് സെന്ററുകള്‍ തുടങ്ങാന്‍ ആരോഗ്യവകുപ്പ് ഡയറക്ടര്‍ അനുമതി നല്‍കി. ഇവര്‍ക്ക് നാഷണല്‍ ഹെല്‍ത്ത് മിഷന്റെ സഹായവും പ്രാദേശിക തദ്ദേശ സ്ഥാപനങ്ങളുടേയും ആശുപത്രി അഡ്‌വൈസറി കമ്മിറ്റികളുടേയും സഹായം ലഭിക്കും. വിവിധ ജില്ലാ ആശുപത്രികളില്‍ 2.5 ലക്ഷം രൂപയുടെ മരുന്നു വാങ്ങാനാണ് കേന്ദ്ര ഫണ്ടില്‍ നിന്നു സര്‍ക്കാര്‍ സഹായം നല്‍കുന്നത്. കൂടാതെ വിവിധ ആശുപത്രികളില്‍ നിലവിലുള്ള പാലിയേറ്റീവ് സെന്ററുകള്‍ മികച്ച രീതിയില്‍ പ്രവര്‍ത്തിപ്പിക്കാനും സഹായം നല്‍കും. അഞ്ചു കോര്‍പറേഷന്‍ പരിധിയിലുള്ള ആശുപത്രികളിലെ പാലിയേറ്റീവ് സെന്ററുകളില്‍ മരുന്നു വാങ്ങാനും ഉപകരണങ്ങള്‍ വാങ്ങാനും പണം കണ്ടെത്തി നല്‍കാന്‍ ആരോഗ്യവകുപ്പ് കോര്‍പറേഷനോട് ആവശ്യപ്പെട്ടിട്ടുണ്ട്.