ന്യൂഡൽഹി
എയർ ഇന്ത്യ വിറ്റഴിച്ച മാതൃകയിൽ എൽ.ഐ.സിയുടെ ഓഹരി വിൽപനയും ഉടനുണ്ടാകുമെന്ന് ബജറ്റ് പ്രസംഗത്തിൽ ധനമന്ത്രി നിർമലാ സീതാരാമൻ. നീലാഞ്ചൽ ഇസ്പത് നിഗം ലിമിറ്റഡിന്റെ ഓഹരി വിറ്റഴിക്കൽ സംബന്ധിച്ച നടപടികൾ പൂർത്തിയായി. എയർ ഇന്ത്യയുടെ ഉടമസ്ഥാവകാശത്തിന്റെ തന്ത്രപരമായ കൈമാറ്റം പൂർത്തിയായതായും നിർമലാ സീതാരാമൻ പറഞ്ഞു.

എയർ ഇന്ത്യയെക്കൂടാതെ ബി.പി.സി.എൽ, ഷിപ്പിങ് കോർപറേഷൻ ഓഫ് ഇന്ത്യ, കണ്ടെയ്‌നർ കോർപറേഷൻ ഓഫ് ഇന്ത്യ, ഐ.ഡി.ബി.ഐ ബാങ്ക്, ബി.ഇ.എം.എൽ, പവൻ ഹാൻസ്, നീലാഞ്ചൽ ഇസ്പത്ത് നിഗം ലിമിറ്റഡ് തുടങ്ങിയവയാണ് വിറ്റഴിക്കുന്ന സ്ഥാപനങ്ങളുടെ പട്ടികയിൽ കേന്ദ്രസർക്കാർ 2021ലെ ബജറ്റിൽ ഉൾപ്പെടുത്തിയിരുന്നത്. എൽ.ഐ.സി വിൽപന 2022ന് മുമ്പുണ്ടാകുമെന്ന് പ്രഖ്യാപിച്ചിരുന്നെങ്കിലും നടപ്പാക്കാൻ സാധിച്ചിരുന്നില്ല.

നാഷണൽ ബാങ്ക് ഫോർ ഫിനാൻസിങ് ഇൻഫ്രാസ്ട്രക്ചർ ആൻഡ് ഡെവലപ്മെന്റും നാഷണൽ അസറ്റ് റീകൺസ്ട്രക്ഷൻ കമ്പനിയും പ്രവർത്തനങ്ങൾ ആരംഭിച്ചതായും നിർമലാ സീതാരാമൻ അറിയിച്ചു.
കമ്പനികൾക്ക് അവയുടെ പ്രവർത്തനം സ്വമേധയാ അവസാനിപ്പിക്കുന്നതിനുള്ള കാലദൈർഘ്യം 2 വർഷം എന്നത് 6 മാസമായി കുറയ്ക്കുന്നതിന് സെന്റർ ഫോർ പ്രോസസിങ് ആക്‌സിലറേറ്റഡ് കോർപറേറ്റ് എക്‌സിറ്റ് സ്ഥാപിക്കും. പാപ്പരത്വ കോഡിൽ ആവശ്യമായ ഭേദഗതികൾ വരുത്തുമെന്നും ധനമന്ത്രി അറിയിച്ചു.