ന്യൂഡൽഹി
പ്രത്യേക സാമ്പത്തിക മേഖലാ നിയമത്തിന് പകരമായി പുതിയ നിയമം കൊണ്ടുവരുമെന്ന് ബജറ്റിൽ ധനമന്ത്രി നിർമലാ സീതാരാമൻ. സംരംഭങ്ങൾ, സേവന ഹബുകൾ എന്നിവയുടെ വികസനത്തിൽ പങ്കാളികളാകാൻ സംസ്ഥാനങ്ങളെ പ്രാപ്തമാക്കുന്നതിനാണ് പുതിയ നിയമനിർമ്മാണം നടത്തുന്നതെന്ന് മന്ത്രി വ്യക്തമാക്കി. ഗിഫ്റ്റ് സിറ്റിയെ കൂടുതൽ ആകർഷകമാക്കും. സാമ്പത്തിക സേവനങ്ങളിലും സാങ്കേതികവിദ്യയിലും മനുഷ്യ വിഭവശേഷി വർധിപ്പിക്കുന്നതിന് സാമ്പത്തിക മാനേജ്മെന്റ്, ഫിൻടെക്, ശാസ്ത്രം, സാങ്കേതികവിദ്യ എൻജിനീയറിങ്, ഗണിത ശാസ്ത്രം എന്നീ കോഴ്സുകൾ നടത്താൻ ലോകോത്തര വിദേശ സർവകലാശാലകളെയും സ്ഥാപനങ്ങളെയും ഗിഫ്റ്റ് സിറ്റിയിൽ അനുവദിക്കും. ഐ.എഫ്.എസ്.സി.എ ഒഴികെയുള്ള എല്ലാ ആഭ്യന്തര നിയന്ത്രണങ്ങളിൽ നിന്നും ഇവയെ ഒഴിവാക്കും.