മലപ്പുറം
ലോകായുക്ത സിറിയക് ജോസഫിനെതിരേ നടത്തിയ ആരോപണങ്ങളിൽ പ്രതിപക്ഷ നേതാക്കൾ വസ്തുതാപരമായി പ്രതികരിക്കുന്നില്ലെന്നും ഇക്കാര്യത്തിൽ സംവാദത്തിന് തയാറുണ്ടോയെന്നും കെ.ടി ജലീൽ എം.എൽ.എ. തെളിവുസഹിതം താൻ മുന്നോട്ടുവച്ച വാദങ്ങൾക്കൊന്നും പ്രതിപക്ഷ നേതാവോ മുൻ പ്രതിപക്ഷ നേതാവോ മുൻമുഖ്യമന്ത്രി ഉമ്മൻചാണ്ടിയോ വസ്തുതാപരമായി പ്രതികരിച്ചതായി കണ്ടില്ല. ഇക്കാര്യത്തിൽ ഒരു തുറന്ന സംവാദത്തിന് യു.ഡി.എഫ് നേതാക്കളായ ഇവരിൽ ആരെങ്കിലും തയാറുണ്ടോയെന്ന് ജലീൽ ഫേസ്ബുക്കിൽ എഴുതിയ കുറിപ്പിൽ ചോദിച്ചു. എല്ലാ കാര്യത്തിലും അഭിപ്രായംപറയാറുള്ള കോട്ടയം രാഷ്ട്രീയത്തിന്റെ അകവും പുറവും അറിയുന്ന മുൻ ചീഫ് വിപ്പ് പി.സി ജോർജ് എന്താണ് മൗനിയായി തുടരുന്നതെന്നും ജലീൽ ചോദിക്കുന്നു.അഭയ കേസിലെ ഒന്നാംപ്രതി ഫാദർ കോട്ടൂരിന്റെ സഹോദരൻ വിവാഹം കഴിച്ചിരിക്കുന്നത് നമ്മുടെ 'കഥാപുരുഷൻ ഏമാന്റെ' ഭാര്യയുടെ സഹോദരിയെയാണെന്ന് ജോമോൻ പുത്തൻപുരക്കലിനോട് കടപ്പാട് എന്ന് രേഖപ്പെടുത്തി ജലീൽ എഴുതുന്നു.