റിയാദ്: കൊറോണ വ്യാപിക്കുന്നുവെന്ന റിപ്പോർട്ടുകളുടെ അടിസ്ഥാനത്തിൽ സഊദി അറേബ്യ ഏർപ്പെടുത്തിയ വിമാന യാത്രാ വിലക്കിൽ യുഎയിലെത്തിയ ഇന്ത്യക്കാരുടെ സഊദി യാത്ര അനിശ്ചിതത്വത്തിലായി. യുഎഇ അടക്കമുള്ള ഇരുപത് രാജ്യങ്ങളിൽ നിന്നുള്ളവർക്കുള്ള വിലക്ക് നാളെ രാത്രി ഒമ്പത് മണിയോടെ പ്രാബല്യത്തിൽ വരുമെന്നാണ് ആഭ്യന്തര മന്ത്രാലയം വ്യക്‌തമാക്കിയത്‌. എന്നാൽ, ഇതിനിടെ സഊദിയിലേക്ക് പ്രവേശനം സാധ്യമാകുന്നവർ വളരെ വിരളമാണ്. അതേസമയം, തുടർ ദിവസങ്ങളിൽ സഊദിയിലേക്ക് പ്രവേശനം കാത്ത് കഴിയുന്ന മലയാളികൾ അടക്കം ആയിരക്കണക്കിന് ഇന്ത്യക്കാരാണ് അനിശ്ചിതത്തിലായത്.

   സഊദി തീരുമാനപ്രകാരം യുഎഇയിൽ നിന്ന് സഊദിയിലേക്ക് നാളെ രാത്രി മുതൽ യാത്ര സാധ്യമാകുകയില്ല. ഇവർക്ക് വിലക്കില്ലാത്ത രാജ്യങ്ങളില്‍ 14 ദിവസം താമസിച്ചാല്‍ മാത്രമേ ഇനി സഊദിയിലെത്താനാവുകയുള്ളൂ. നേരത്തെ യുഎഇയിൽ എത്തിയവരിൽ പതിനാല് ദിവസം ഇവിടെ കഴിഞ്ഞവർക്ക് നാളെ രാത്രി ഒമ്പത് മണിക്ക് മുമ്പാണെങ്കിൽ സഊദിയിലേക്ക് പ്രവേശിക്കാനാകും. അല്ലെങ്കില്‍ വിലക്ക് നീങ്ങുന്നത് വരെ ഇവിടെ കഴിയുകയോ ഇന്ത്യയിലേക്ക് തിരിച്ചുപോവുകയോ ചെയ്യേണ്ടി വരും. നിലവിലെ സാഹചര്യത്തിൽ എന്ത് ചെയ്യണമെന്നറിയാത്ത സ്ഥിതിയിലാണെന്ന് യുഎഇയിൽ എത്തിയ മലയാളികൾ സുപ്രഭാതവുമായി പങ്കുവെച്ചു. 

    വരും ദിവസങ്ങളിലെ സാഹചര്യങ്ങൾ കണക്കിലെടുത്ത് തീരുമാനം കൈകൊള്ളാമെന്ന നിലപാടിലാണിപ്പോൾ ഇവർ. സഊദി ലിസ്റ്റിൽ പെടാത്ത തൊട്ടടുത്ത ജിസിസി രാജ്യങ്ങൾ വഴി യുള്ള പ്രവേശനമടക്കമുള്ള കാര്യങ്ങളാണ് ഇവർ ആലോചിക്കുന്നത്. എന്നാൽ,  ഇതിലെ സാങ്കേതികത്വങ്ങൾ ഇവരെ നിരാശരാക്കുന്നുണ്ട്. എങ്കിലും വരും ദിവസങ്ങളിൽ ഇതിൽ വ്യക്തത വരുമെന്ന കണക്ക് കൂട്ടലിലാണ് പലരും. താത്‌കാലിക വിലക്കായതിനാൽ ഉടൻ നീങ്ങിയേക്കുമെന്ന് കരുതുന്നവരുമുണ്ട്.